BOBONARU, 10 Marsu 2026 (TATOLI) – Diresaun Servisu Munisipál Edukasaun, Autoridade Munisípiu Bobonaru simu ona profesór foun bolsa kandidatu hamutuk na’in-104 husi Ministériu Edukasaun no daudaun hahú ona sira-nia kna’ar tuir kolokasaun iha eskola idaidak.
Diretór Edukasaun Bobonaru, Miguel Freitas, konsidera kolokasaun profesór sira ne’e apoia ensinu no aprendizajen iha eskola balun, tanba antes ne’e manorin barak tama ona iha reforma obrigatória.
Notísia relevante: Profesór foun 91 aprezenta-aan ba Autoridade Bobonaro
“Ami simu kolokasaun profesór hamutuk 104. Ha’u orienta tuir idaidak nia kolokasaun ba ona iha sira-nia serbisu fatin”, nia informa ba jornalista sira, ohin.
Miguel Freitas dehan maski durante ne’e Edukasaun Bobonaru simu kolokasaun profesór barak, maibé Ensinu Pré-Eskolár no Ensinu Bazíku balun iha áre rurál nafatin falta manorin.
“Ami hein nafatin kolokasaun husi nasionál. Sira iha baze ezije profesór, ami iha ne’e labele responde. Ami presiza nafatin profesór Pré-Eskolár no Ensinu Báziku tanba eskola balun iha profesór na’in-rua de’it mak atende estudante ba to’o sestu anu”, nia relata.
Dirijente ne’e mós informa katak, iha tinan ne’e, Governu hetan apoiu husi UNICEF ne’ebé sei konstrui eskola 23 iha munisípiu Bobonaru.
“Iha primeiru períodu konstrui uluk eskola 13. Ami halo supervizaun hotu tiha ona, he’in implementasaun ba konstrusaun iha Marsu ou Abríl, tanba ita-nia eskola barak mak kondisaun la di’ak no balun sei didin ho bebak”, nia dehan.
Tuir dadus, totál profesór iha munisípiu Bobonaru hamutuk 1.600, kompostu husi feto 623 no mane 977 husi Ensinu Pré-Eskolár 119, Ensinu Báziku 1.294, Sekundáriu Jerál 98, Tékniku Vokasionál 74 no Ensinu Rekorrente 15.
Totál estudante hamutuk 36.044 husi Pré-Eskolár 3.125, Ensinu Báziku 26.365, Sekundáriu Jerál 4.930, Tékniku Vokasionál 1.314 no Ensinu Rekrorente 310. Numeru estudante ne’e akumula iha eskola 236.
Notísia relevante: DSME Bobonaro sei koloka profesór 105 ba iha EPE-Ensinu Báziku
Jornalista: Sergio da Cruz
Editora: Maria Auxiliadora
