BOBONARO, 23 agostu 2024 (TATOLI) – Diresaun Servisu Munisipál Edukasaun (DSME) Autoridade Munisípiu Bobonaro iha tempu badak sei koloka profesór foun ne’ebé selesionadu iha vaga bolsa kandidatu faze daruak hamutuk na’in-105 atu ba hanorin estudante-sira iha Ensinu Pre-Eskolar (EPE) no Ensinu Báziku primeiru, segundu no terseiru siklu kompostu husi Ensinu Báziku Filiál (EBF) no Ensinu Báziku Sentrál (EBC, sigla portugés) ne’ebé durante enfrenta problema menus profesór.
Diretór Servisu Munisipál Edukasaun Bobonaro, Miguel Freitas, konfirma lista profesór foun 107 dadaun ne’e DSME haruka ona ba diresaun nasionál Ministériu Edukasaun atu halo planu ba kolokasaun.
Notísia relevante: Edukasaun Bobonaro koloka profesór 67 ba eskola 43
“Ami sei hein desizaun husi nasionál ,bazeaa ba enkontru iha nasionál deside profesór-sira ne’e balu destaka ba pre-eskolár no balu ba ensinu báziku sira ne’e balu sei sai profesór turma no balu mós sei sai profesór disiplina, ezemplu ba sestu-anu, sé ami haree ba terseiru siklu sei mamuk, ami sei destaka ba fatin-fatin sira-ne’ebé presiza,” nia informa ba jornalista sira iha salaun Maria-Tapo, sesta ne’e.
Diretór Miguel konsidera ho prezensa profesór foun hirak-ne’e bele responde ona preokupasaun durante hodi garante prosesu ensinu no aprendizajen la’o ho di’ak liuliu ezame nasionál tinan letivu 2024.
Planu kolokasaun ne’e sei prioriza mós EBF Poerema ne’ebé daudaun ne’e iha de’it manorin na’in-ida.
“Ida EBF Poerema ne’e ami-nia planu, tenke tau fali ida ou rua ba iha ne’ebá tanba iha ne’ebá to’o kuartu-anu, ema ida mesak labele hanorin,” nia katak.
Enkuantu iha fulan hirak liu bá DSME Bobonaro koloka ona profesór bolsa kandidatura na’in-67 ne’ebé selesionadu iha faze dahuluk hodi ba hanorin iha eskola 43.
Notísia relevante: Edukasaun Bobonaro garante ezame períodu daruak la’o ho di’ak
Jornalista: Sérgio da Cruz
Editór: Evaristo Soares Martins
