VIKEKE, 11 Marsu 2026 (TATOLI)—Xefe Aldeia Uma-Boot, Suku Luka, Postu Administrativu Vikeke, Munisípiu Vikeke, Jeremias Marques, husu Autoridade Protesaun Sivíl (APC-sigla portugeza) apoiu materiál rekuperasaun ba vítima afetada inundasaun hamutuk uma-kain-14.
“Ami afetadu maka’as ba inundasaun husi mota Uelolo iha tinan hirak liuba. Uma balun bee-tama no uma-kain hamutuk 14 afetadu maka’as. Uma kuaze aat totál, maibé to’o agora seidauk hetan materiál rekuperasaun. Tan ne’e, ami hakarak husu ba APC hodi tau-matan ba vítima afetada inundasaun uma-kain 14 ne’ebé seidauk hetan apoiu materiál rekuperasaun nian,” Jeremias Marques ba jornalista sira iha Aldeia Uma-Boot, Kuarta ne’e.
Autoridade ne’e afirma, kona-ba dadus vítima uma-kain 14, parte autoridade aprezenta hotu ona bá APC, maibé to’o agora vítima sira la hetan materiál rekuperasaun.
“Kona-ba dadus afetadu inundasaun iha Aldeia Uma-Boot nian, ami aprezenta hotu ona ba parte APC to’o ohin loron sira la hetan apoiu. Tan ne’e, ha’u hakarak hato’o ba APC hodi tau-matan ba ita-nia vítima sira,” nia hato’o.
Iha fatin hanesan, Xefe Suku Lukam, Manuel Gomes prefere ba parte relevante presiza tau-matan ba abitante Aldeia Uma-Boot ne’ebé afetadu ba inundasaun.
“Ita hotu haree populasaun Uma-Boot sai vítima ba inundasaun husi mota Uelolo. Komunidade sira uma hetan estragu makaas, maibé sira seidauk hetan apoiu, nune’e ha’u sujere ba parte APC tau-matan ba ita-nia populasaun uma-kain 14 ne’ebé seidauk hetan apoiu,” nia sujere.
Hatán ba preokupasaun ne’e, Prezidente APC, Jesuíno dos Reis de Matos Carvalho, haktuir, kona-ba autoridade sira-nia preokupasaun ba materiál rekuperasaun ba vítima uma-kain 14, APC sei esforsu hodi aselera apoiu ba vítima sira.
“Ha’u sei aselera prosesu rekuperasaun ba família uma-kain 14 ne’ebé mak afeta husi inundasaun sira-ne’e atu hetan mós apoiu emerjénsia no sei hetan materiál rekuperasaun. Prosesu orsamentu apoiu ba maun-de-obra ne’e mak demora, tanba ne’e mak prosesu kle’ur, maibé ba ita-nia materiál rekuperasun nian ita preparadu hela,” nia esplika.
Entretantu, populasaun husi Aldeia Uma-Boot, Suku Luka, uma-kain hamutuk 14 hetan afetadu husi inundasaun kauza husi mota Uelolo, akontese iha tinan 2024 ne’ebé rezulta uma hetan estragu totál.
Jornalista: Vitorino Lopes da Costa
Editór: Xisto Freitas da Piedade
