DILI, 12 Marsu 2026 (TATOLI)—Autoridade Nasionál Lisensiamentu Ambientál, Institutu Públiku (ANLA, I.P) atribui sertifikadu lisensa ambientál kategória B ba Ministériu Transporte Komunikasaun (MTK) ba projetu reabilitasaun aeroportu Karavela, Postu Administrativbu Vemasse, Munisípiu Baukau.
Prezidente Autoridade Nasionál Lisensa Ambientál, Maximiano de Oliveira, hateten atribuisaun sertifikadu ba MTK atu implementa projetu reabilitasaun ba portuKCaravela Baukau, ho ninia medida eskala 24.000 m², tanba antes ne’e sira mós submete ona dokumentu sira inklui avaliasaun impaktu ambientál.
“Projetu refere hetan apoiu husi Governu Japaun no ninia kontratu sei asina iha Japaun. Projetu ne’e konsidera ba kategória B tanba bazeia ba dekrutu-lei nú. 39/2022, alterasaun dahuluk husi dekretu-lei nú. 5/2011. Katak, portu hotu-hotu tanba iha aneksu A maibé tanba projetu ne’e reabilitasaun de’it no grand project ne’ebé benefísia ba ema hotu,” Prezidente ANLA ne’e informa ba Agência Tatoli iha nia kna’ar fatin, ohin.
Iha tinan 2026, nia hatutan, inísiu husi Janeiru to’o Marsu, ANLA konsege atribui lisensa ambientál ba kategória B hamutuk neen (6) ne’ebé kompostu husi konstrusaun CBD 6 iha Timor Plaza, Utama Karya aspal mixing plan iha Maliana, Otél Ramelau Aimutin, Heifu Construction Cement iha Tibar, Montana Diak aspal mixing plan iha Ainaru no seluk tan.
Kategória C ne’e hamutuk 53 ne’ebé kompostu husi ofisina, karpintária, klínika, restaurante no apartamentu ki’ikoan sira, enkuantu kategória A sira seidauk rejista.
Diretór Jerál Transporte no Komunikasaun, Constantino Ferreira Soares, hato’o agradesimentu ba parte ANLA, I.Ρ. ne’ebé ofisialmente entrega ona lisensa ambientál ba parte Governu hanesan Ministériu Transporte no Komunikasaun (MTK), antes atu implementa projetu ne’e rasik.
“Nune’e, parte ajénsia internasionál ne’ebé apoiu hanesan JICA, sira hakarak tenke iha ona lisensa ambientál antes implementa projetu refere tanba ne’e ami esforsu hodi kompleta rekezitu hotu no parte JICA sei tau prioridade no importánsia ba iha impaktu ambiente, ami mós sei submete relatóriu finál ba ANLA,” nia dehan.
Jornalista : Alexandra da Costa
Editór : Cancio Ximenes
