OEKUSI, 12 Marsu 2026 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, kuarta ne’e, selebra akordu ofisiál ho ajénsia internasionál Marie Stopes atu kontinua apoia advokasia ba Oekusi kona-ba planeamentu família.
“Asina MoU ne’e atu haree ba parte advokasia, fó seguransa no protesaun ba feto no labarik feto no ita-nia povu iha Oekusi,” Prezidente Autoridade dehan iha salaun Álfandega Palaban, ohin.
Nia afirma, Autoridade RAEOA selebra MoU ne’e la’ós haree ba setór saúde de’it, maibé kobre mós aspetu barak, relasaun ho protesaun direitu feto no labarik feto inklui joventude foinsa’e sira, nu’udar poténsia futuru nasaun nian.
“Akordu uluk, ita haree liu ba área saúde maibé agora nesesidade ba planeiamentu família, nesesidade proteze direitu feto, labele haree de’it husi parte saúde, maibé haree mós nesesidade aspetu ekonomia,” nia énfaze.
Tuir nia observasaun, durante tinan barak, Timor-Leste enfrenta dezafíu barak, kazu barak akontese ba estudante sira, balu isin rua sedu, kaben sedu, joven barak monu ba poténsia moras transmitidu, entaun presiza halo advokásia, “Ne’ebé MoU ne’e estabelese korridór kooperasaun ba advokasia ne’e”.
Notísia relevante:Planeamentu familiár importante hodi redús númeru mortalidade materna iha Timor-Leste
Diretora Ezekutiva Marie Stopes, Maria Amelia N. Barreto, kompromete sei kumpre selebrasaun akordu referidu, hodi garante atendimentu ba públiku ho seguru.
“MSI mai atu haforsa de’it sistema ne’ebé RAEOA iha ona. Ita espera katak kooperasaun ne’e bele la’o di’ak, no ami prontu kumpre saida mak prevista ona iha akordu ne’e nia laran, tanba antes ami kobre área saúde de’it, maibé ho akordu foun ne’e kobre mós asuntu sira seluk liga direita nesesidade povu,” nia hateten
Notísia relevante:RAEOA selebra MoU ho Marie Stopes
Jornalista: Abílio Elo Nini
Editór: Rafael Ximenes de A. Belo
