BAUKAU, 17 Marsu 2026 (TATOLI)—Autoridade Munisipál Baukau sei hetan totál kadeira 17 iha asembleia bainhira realiza eleisaun munisipál liuhusi podér lokál no desentralizasaun administrativa.
Diretór Komisaun Nasionál Eleisaun (CNE-sigla portugeza) Baukau, Esmeraldo Damião Belo, esplika númeru referidu bazeia ba totál eleitór ne’ebé eziste iha Baukau iha-ne’ebé sei atribui ba partidu polítika sira-ne’ebé sei partisipa iha eleisaun kámara munisipál bazeia ba kontajen proporsionál.
“Kadeira 17 ba membru asembleia munisipál bazeia totál eleitór ne’ebé eziste iha Baukau,” Diretór CNE Munisípiu Baukau hateten iha Sentru Konvensaun Baukau (CCB-sigla portugeza) Vila Antiga, Tersa ne’e.
Esmeraldo Belo relata barreira ba partidu polítiku mak pursentu 4 iha-ne’ebé kada partidu polítiku sei kompete atu hadau kadeira 17 iha asembleia munisipál bainhira atu implementa podér lokál no desentralizasaun administrativa.
Nia subliña tuir kontajen ba kada kadeira sei utiliza formula pursentu 4 multiplika ba totál votu válidu nune’e partidu polítiku ne’ebé hakat liu bareira no sai vensedór mak iha direitu sai maioria iha asembleia munisipál.
Tuir dadus, totál eleitór iha Munisípiu Baukau hamutuk 107.261 iha-ne’ebé atualiza ona ba kartaun biométrika hamutuk 40.159 korresponde pursentu 37.44.
Entertantu, podér lokál desentralizasaun administrativa bainhira implementa bazeia ba lei númeru 23/2023, loron 10 Novembru, enkuantu kona-ba eleisaun bazeia ba Lei Númeru 22/2021 loron 04 Novembru kona-ba eleisaun munisipál ne’ebé sei regulariza mekanizmu eleisaun ba membru asembleia no Prezidente Autoridade Munisipál.
Jornalista: Natalino Belo
Editór: Xisto Freitas da Piedade
