BOBONARU, 17 Marsu 2026 (TATOLI)-Reuniaun dahuluk Asembleia Postu Administrativu (ASPA) diskute no aprova programa prioridade sia ba tinan 2027 atu rezolve ho Orsamentu Planu Dezenvolvimentu Integradu Munisipál (PDIM).
Prezidente ASPA, Tomás Barreto Henriques, informa katak prioridade sira ne’e mai kedas husi proposta husi aldeia no suku sira ne’ebé foka ba setór saúde, edukasaun, agrikultura no obra públika.
“Prioridade sia ne’e ohin ita aprova ona. Ita sei ba diskute iha nivel munisipál iha enkontru Konsellu Koordenasaun Munisipál hafoin lori bá Komisaun Revizaun Orsamentu”, nia hateten iha intervensaun iha ámbitu reuniaun ne’ebé realiza iha edifísiu administrasaun postu Bobonaru, ohin.
Prioridade sia ne’e mak konstrusaun Postu Saúde Apagolo, iha suku Ai-Asa, Postu Saúde no rezidénsia ba pesoál saúde iha aldeia Purugua, suku Ilat-laun, kanalizasaun sistema bee-moos iha suku Lour, konstrusaun estrada husi kruzamentu Tebabui bá merkadu Karabau, estrada husi suku Atuaben bá Ai-Aras, iha suku Soilesu, konstrusaun Sentru Viveiru Permanente iha Maulolok, harii sala tolu iha Ensinu Bazíku Filiál (EBF) Aldeia Aimeti, suku Tebabui, no konstrusaun estrada husi Ai-Aras bá Aibou, suku Soilesu, no harii sala haat iha Sentru Saúde Bobonaru mak hanesan sala ba konsulta, imunizasaun, emerjénsia no farmásia.
Notísia relevante: ASPA Bobonaru hili programa prioridade sia ba tinan-oin
Xefe Suku Ilat-laun mós husu ba Autoridade Munisípiu Bobonaru atu konsidera no labele halo mudansa ba prioridade sira hanesan konstrusaun Postu Saúde no rezidensia ba pesóal saúde iha aldeia Purugua.
“Postu saúde ne’e ba multi suku, postu no munisípiu, tanba komunidade balun husi parte Kailaku, suku Raiheu, no Atudara, no parte Obulo, munisípiu Ermera, mós bele mai asesu tanba sira-nia distánsia besik. Depo’is aldeia iha Purugua ne’e atu asesu bá postu saúde Ilat-laun dook no tempu udan hanesan ne’e susar tanba mota-boot”, nia dehan.
Realizasaun reuniaun ASPA bazeia ba Dekretu-Lei númeru 84/2023, alterasaun dalimak husi Dekretu-Lei númeru 3/2016, kona-ba Estatutu administrasaun, autoridade munisipál no grupu serbisu interministeriál kona-ba estabelesimentu desentralizasaun administrativa bazeia ba diploma ministeriál númeru 50/2016, kona-ba regra funsionamentu administrativu.
Iha tinan 2026 ne’e, liuhusi orsamentu PDIM postu administrativu Bobonaru hetan projetu lima hanesan onstrusaun Postu Saúde iha suku Tapó, ho orsamentu rihun $120 no konstrusaun irrigasaun Sordoli ho totál orsamentu rihun $270.
Aleinde ne’e, konstrusaun sala tolu iha Ensinu Báziku Sentrál Dom Kaileto no reablitasaun sala neen iha Ex-Primária Dom Kaileto ho valór rihun $150, konstrusaun sala neen iha Poeleu, suku Male-Ubu, ho montante rihun $150 no konstrusaun Postu Saúde no rezidénsia ba pesoál saúde iha suku Oe-leu ho montante rihun $108.
Notísia relevante: PDIM Bobonaru: Progresu signifikativu iha 2025, dezafiu orsamentu difikulta implementasaun 2026
Jornalista: Sergio da Cruz
Editora: Maria Auxiliadora
