LIBERIA, 17 Marsu 2026 (TATOLI)-Sekretáriu Jerál g7+, Helder da Costa ho delegasaun iha loron 17 fulan-Marsu 2026, hasoru malu ho Prezidente Parlamentu Nasionál Repúblika, Liberia, Hon Ricard Nagbe Koon, hodi konsolida liután polítika karta ratifikasaun g7+ no mós apresia lideransa nasaun ne’ebá nian ne’ebé daudaun ne’e asume hela kna’ar hanesan vise prezidente g7+.
Sekretariu jerál g7+, Helder da Costa hateten Prezidente Parlamentu Liberia apresia ho vizita husi delegasaun g7+ hodi diskute pontu importante rua, dahuluk kona-ba g7+ espera sentimentu gratidaun ba nasaun ne’e tanba daudaun ne’e assume kna’ar nu’udar Vise Prezidente Organizasaun g7+, no daruak kona-ba posibilidade Liberia atu ratifika karta g7+ ne’ebé oras ne’e rejistu iha ONU.
Notísia Relevante : g7+ aprezenta operasionalizasaun Sentru Konsulta Rapidu g7+ ba Vise MNEK Liberia
“Ami espresa ami-nia gratidaun ba lideransa Liberia nian nu’udar Vise-Prezidente g7+ nian no segundu kona-ba posibilidade sira atu ratifika karta g7+ nian ne’ebé oras ne’e daudaun rejistadu ona iha ONU,” hateten Sekretáriu Jerál g7+ ne’e iha Monrovia Liberia.
Iha fatin hanesan Prezidente Parlamentu Nasionál, Richard Nagbe Koon, kompromete sei aselera prosesu ratifikasaun karta g7+ nian iha ONU.
“Ami kompromete no sei la adia tan, no aselera prosesu ratifikasaun karta g7+ nian,” nia hateten.
Karta g7+ ne’e hetan akordu hosi nasaun Estadu membru sira bainhira hala’o enkontru Ministeriál g7+ ba dala III, iha Lomé Togo iha fulan-Maiu 2014 hodi formaliza liután adezaun g7+ nian.
Karta ne’e ratifika hosi nasaun membru hamutuk neen maka Afganistaun, Burundi, São Tomé e Prínsipe, Sierra Leone, Timor-Leste no Iémen. Ratifikasaun ne’e halo tuir regulamentu nasionál nasaun membru ida-idak nian.
Entertantu, karta g7+ foin lalais ne’e hetan ona sertifikasaun hosi Tratadu Nasaun Unida nian hodi rekoñese grupu ne’e hanesan organizasaun multilaterál ida iha órgaun ONU nian.
Notísia Relevante :Delegasaun g7+ hala’o misaun diplomátika nivel aas bá Libéria
Jornalista : Jogerjo Guterres
Editór : Florencio Miranda Ximenes
