BAUKAU, 19 Marsu 2026 (TATOLI)—Abitante Suku Gariuai, Postu Administrativu Baukau Vila, Munisípiu Baukau, ho naran Félix Ximenes, idade 66 (moris iha 25 Maiu 1960) lakon vida hafoin durante loron-neen lakon iha ai-bubur laran iha área Aldeia Darsula, Suku Gariuai.
Tuir kronolojia, vítima hamutuk ho família bá hili ai iha ai-bubur laran, Sesta (13/03/2026), maibé vítima la’o lakon tiha. Prosesu buka tuir vítima ne’e to’o loron-neen mak foin deskobre iha ai-bubur laran, Kuarta (18/03), maizumenus tuku 17:00 Otl, ho kondisaun laiha iis.
“Vítima nia kondisaun moras nune’e família husu hein iha kareta laran maibe bainhira fila vítima laiha ona no lakon durante loron-neen mak foin hetan horisehik,” Xefe Suku Gariuai, Postu Administrativu Baukau Vila, Arlindo Belo Freitas hateten ba TATOLI liuhusi telefónema, Kinta ne’e.
Vítima ho estatutu kazadu, nu’udár profesór iha Ensinu Báziku Sentrál iha Suku Gariuai, sofre moras metál. To’o oras ne’e, seidauk hatene kauza husi vítima nia mate.
Nunee, parte família hamutuk ho autoridade deside transfere ona vítima nia isin-mate bá Hospital Nacional Guido Valadares (HNGV-sigla portugezas) hodi halo autópsia.
“Horikalan transfere ona ba HNGV atu kontinua autópsia,” Arlindo Freitas haktuir.
Jornalista: Natalino Belo
Editór: Xisto Freitas da Piedade
