DILI, 23 Marsu 2026 (TATOLI)–Prevedór Direitu Umanu no Justisa, Virgílio da Silva Guterres ‘Lamukan’ desizaun uza prosesu eleminatóriu ba rekrutamentu foun membru Polísia Nasionál Timor-Leste (PNTL).
“Ha’u hanesan Prevedór, apoia saida mak Primeiru-Ministru hateten. Se ita hakarak atu PNTL hetan fiar husi públiku, ida-ne’e ita tenke hahú, tanba prosesu rekrutamentu mai ne’e hamosu kestaun lubuk ida ona. Ha’u konkorda liután kuandu prosesu ne’e hanesan Primeiru-Ministru hateten uza prosesu eleminatóriu halo avaliasaun ba teste ninian, kuandu la liu nia hela. Maibé dokumentu kuandu la falla nia hela eleminatóriu,” Prevedór Virgílio hateten ba Jornalista sira iha ninia knaar fatin, Praia dos Coqueiros, Segunda ohin.
Nia nota, prosesu ne’ebé Governu opta agora bele dignifika entidade maibé atu dignifika intitusaun maka rekrutamentu tuirmai labele iha deskriminasaun.
“Prosesu ida-ne’e la’ós de’it atu dignifika entidade ida-ne’e maibé dignifka mós nia inan-aman, tiun ne’ebé sai veternu atu aprezenta katak aman sai veteranu la’ós tanba nia tuur de’it sai veternu maibé tanba nia halo sakrifísiu. Entaun, oan sira tenke liuhusi prosesu rigórmaka sira prova katak merese duni la’ós tanba aman veteranu ka aman Polísia husi ita ba tau de’it numeru kiik,” nia akresenta.
Notísia relevante : PM Xanana rekomenda halo rekrutamentu foun ba kadetes PNTL
Iha sorin seluk, Provedór husu ba Ministériu Públiku (MP) atu loke prosesu hasoru Komisaun Rekrutamentu tanba mosu irregularidade iha prosesu rekrutamentu ba membru foun PNTL, ne’ebé prosesu tomak uza osan Estadu.
“Osan ne’ebé uza iha rekrutamentu uluk ne’e maka ha’u dehan ita tenke uza medida korretiva tanba prosesu ne’e identifika irregularidade no hamosu ona prejuízu ba Estadu, osan hira mak ita uza ona, ema barak mak sai vítima, entaun ema balun iha prosesu ne’e tenke responsabiliza,” nia katak.
Tanba ne’e, Provedór husu atu halo investigasaun ba Komisaun hodi hatene loloos uza ona osan hira ba prosesu ne’e no tanba sá mak mosu irregularidade.
“Tenke aplika investigasaun komprensivu, profundu no tenke kobre elementu sira ne’ebé loke responsabiliza ba atu hatene katak violasaun ba irregularidade. Ida-ne’e tenke loke hotu atu nune’e bele hatene dehan sé loos maka iha laran hodi responsabiliza irregularidade to’o mosu falsifikasaun dokumentu ka manipulasaun informasaun. Karik buat ne’e krime entaun Ministériu Públiku mós bele instaura prosesu atu lori prosesu ne’e ba oin atu nune’e ida-ne’ebé envolve prosesu ne’e tenke responsável,” nia tenik.
Virgílio hatutan: “Ita labele lakon de’it. Se ita dehan prosesu ne’e irregulár ne’e tenke iha ema ida ka rua tenke responsabiliza irregularidade ne’e, ita labele husik gasta de’it osan hanesan ne’e.”
Jornalista : Natalino Costa
Editora : Julia Chatarina
