Autoridade Kovalima elabora esbosu kontrola komunidade husik animal livre
KOVALIMA , 24 Marsu 2026 (TATOLI)-Prezidente Autoridade Munisípiu Kovalima, Miguel Armada Cardoso hateten, daudaun ne’e ekipa servisu hahú elabora esbosu ida atu oinsá kontrola no fó sansaun ba komunidade sira ne’ebé kesi ka husik animal la’o livre iha fatin públiku no sidade laran.
“Ita agora elabora hela sansaun rigór maibé sei hetan aprovasaun husi reuniaun Konsellu Koordenasaun Munisipàl foti desizaun hodi kontrola komunidade nia animal kesi iha estrada sira,”nia hateten ba jornalista sira iha Kovalima, tersa ne’e.
Notísia Relevante :Autoridade Kovalima forma ekipa task force halo operasaun ba animál la’o livre
Maibé, nia dehan ho base ba lei ijiéne no ordém públika númeru 33/2008, maka oras ne’e, Autoridade Munisípiu fó orientasaun ba lideransa komunitária hamutuk ho komunnidade sira atu hamoos auto-estrada, no mós implementa programa tara bandu ho sansaun rigór nune’e komunidade sira labele husik animal la’o livre hodi hamosu asidente tráfegu iha área auto-estrada ninian.
Iha sorin seluk, Diretór Servisu Munisipál Água Saniamentu no Ambiente (SMASA), Angelino Henrique relata nia parte daudaun ona trasa ona planu no programa sensibilizasaun informasaun ba komunidade atu iha koñesimentu di’ak kona-ba soe lixu iha fatin lixu no kesi animál haki’ak hodi kontribui ba saúde públiku.
“Ita-nia komunidade sira la sulan karau nune’e iha auto estrada nakonu ho karau no karau teen nune’e ami mós halo ona koordenasaun ho lideransa komunitária sira atu sulan karau,” nia hateten.
Notísia Relevante :Labele husik livre animál
Jornalista :Celestina Teles
Editór : Florencio Miranda Ximenes
