OEKUSI, 24 Marsu 2026 (TATOLI) – Família uma-kain haat, ne’ebé sei kontinua hela iha merkadu Numbei iha Rejiaun Administrativa Espesiál Oekusi Ambeno (RAEOA), deklara katak, rai sira-ne’ebé sira hela ba, nia estatutu rai privadu la’ós rai Estadu tanba, família hirak-ne’e hela no halo uma dezde 1974 to’o ohin loron.
Armindo Pereira, nu’udar portavós fó deklarasaun ofisiál ne’e, liuhusi konferénsia imprensa hala’o iha merkadu Numbei, segunda ne’e.
“Informasaun ne’ebé ema balun informa ba SEATOU katak, rai ne’e Estadu nian, maibé ami hakarak informa no deklara ba públiku liliu Governu katak, rai ne’ebé ami hela ne’e rai privadu, ami hela iha ne’e dezde 1974 to’o ohin loron, ne’ebé la’ós rai Estadu,” nia hateten liuhusi konferénsia imprensa hala’o iha merkadu Numbei, segunda ne’e.
Notísia relevante:SEATOU apela ba uma-kain haat iha merkadu Numbei atu hamamuk ona fatin
Nia informa, antes ne’e iha 2025, Autoridade RAEOA liuhusi Diresaun Rejionál Terra Propriedade hala’o ona diálogu ho komersiante sira iha merkadu Numbei, no família uma-kain haat, deklara ona katak se Governu presiza atu halo dezenvolvimentu, nu’udar sidadaun timoroan prontu koopera, maibé presiza kria uluk kondisaun ba uma-kain haat ne’ebé hela nanis ona.
Iha dokumentu komprovativu
Tuir nia, antes ne’e mós SEATOU hasai ona últimatu ba uma-kain haat, ne’ebé kontinua hela iha merkadu Numbei atu hamamuk fatin, tanba nia espera molok halo despezu administrativu presiza hala’o uluk diálogu hodi identifika dokumentu kona-ba estatutu rai, uma no plantasaun sira.
“To’o ohin loron ami sei hein ekipa konjunta husi RAEOA atu mai ko’alia ho ami, ne’e ami kontinua hein, fulan 10 ona ami hein sira, tanba ami rona, ema balun fó informasaun ba SEATOU katak rai ne’e Estadu, maibé ami hakarak deklara katak la’ós rai Estadu, maibé ne’e rai privadu eransa dezde uluk 1974 to’o agora, ho nia medida rai metru 6.400 kuadradu, ne’ebé agora fahe ona ba uma-kain haat,” nia hateten.
Notísia relevante:Prazu loron 30 ba uma-kain haat iha merkadu Numbei hamamuk fatin
Nia esplika, dokumentu komprovativu ne’ebé iha mak hanesan, karta legalidade rai eransa ne’ebé atribui kedas iha Governu Indonézia, karta evidénsia selu ba kofre Estadu, no karta identifikasaun husi ekipa Sistema Nasionál Kadastru (SNC, sigla portugés), inklui dokumentu seluktan relasaun ho estatutu rai.
“Tan ne’e, ami seidauk hamamuk fatin, tanba ami hela iha rai privadu no uma privadu, depois kooperasaun ba ami seidauk iha, sei Governu hasai ami, depois ami ba hela iha ne’ebé,” nia afirma.
Notísia relevante:Negosiante merkadu Numbei husu Autoridade RAEOA prosesa lalais indemnizasaun
Hatan ba rekomendasaun sira-ne’e, Diretór Diresaun Rejionál Terra Propriedade, José Ase Neno Colo, esplika, daudaun ami sei halo koordenasaun serbisu ho Diresaun Rejionál Komérsiu Industria, Diresaun Rejionál Infraestrutura, Agrikultura no Terra Propriedade.
“Ekipa ne’e ida-idak ho serbisu, atu rekolla sira-nia rikusoin, hanesan uma, rai, plantasaun, atu halo kompozisaun, ezemplu atu uma haat ne’e, ita halo kompozisaun maizumenus ho valór osan hira, ba terras nian, sei haree ba legalidade rai, tan ne’e mak iha tempu-badak ita sei koordena ho ekipa konjunta ne’e atu ami tuun ba dala ida de’it atu ko’alia ho sira,” nia promete.
Notísia relevante:Abitante 156 iha merkadu Numbei koopera ho Governu sobu rasik uma-kioske
Jornalista: Abílio Elo Nini
Editór: Rafael Ximenes de A. Belo
