Sekretáriu Estadu Expedito asina akordu ho mídia lima ba distribuisaun jornál
DILI, 24 Marsu 2026 (TATOLI)—Sekretáriu Estadu Komunikasaun Sosiál, Expedito Dias Ximenes, Tersa ne’e, asina akordu serbisu ho jestór husi mídia lima hodi kontinua halo distribuisaun ba jornál iha nasionál, munisípiu to’o postu, nune’e ema hotu bele akompaña prosesu dezenvolvimentu iha rai-laran.
Jornál lima ne’e mak hanesan hanesan Jornál Diáriu Suara Timor-Leste Loro Sa’e (STL), Jornál Independente, Timor Post, Dili Post, Dili Post, no Jornál Nasionál Diáriu.
Iha biban ne’e, Sekretáriu Estadu Expedito mós asina akordu ho mídia konvensionál dijitál 10 hodi transmite no divulga programa IX Governu Konstitusionál liuhusi programa Sekretaria Estadu Komunikasaun Sosiál (SEKOMS) hanaran ‘Governu Rona’ no ‘Haree Rasik’.
SEKOMS oferese orsamentu ba mídia 10 ho montante totál $90.000-resin, ba implementasaun akordu kooperasaun serbisu durante tinan-ida.
“Ohin Sekretáriu Estadu Komunikasaun Sosiál halo akordu serbisu hamutuk ho mídia hotu-hotu, kompostu husi mídia konvensionais imprensa ho plataforma dijitál online sira,” Expedito Dias hato’o ba Jornalista sira hafoin asina akordu serbisu iha sala enkontru SEKOMS, Palásiu Governu.
Notísia relevante : Impaktu notísia husi mídia online hasa’e persepsaun públiku kona-ba povu lian-laek sira
Nia dehan, IX Governu Konstitusionál kontinua fó apoiu ba mídia sira, maski iha tinan 2026 orsamentu ba SEKOMS tun oituan, kompara ho tinan 2025, maibé Governu nafatin fó atensaun ba dezenvolvimentu mídia iha Timor-Leste.
Nune’e, SEKOMS hili mídia konvensionál ba programa ‘Governu Rona’ ho plataforma televizaun streaming no TVE ho plataforma online OTV ba programa ‘Haree Rasik’.
Nia esplika, husi programa ‘Haree Rasik’, SEKOMS mak prodús depois TVE no OT mak on Air.
“Serbisu hamutuk ida-ne’e atubele fortifika liután relasaun entre Governu ho mídia nasionál, maibé ha’u hakarak subliña iha ne’e katak mezmu ke serbisu hamutuk ho programa distribuisaun jornál ba munisípiu sira, programa Rona Rasik no Haree Rasik, IX Governu mós tau publisidade barak ba plataforma dijitál sira, maibé la signifika Governu atu interven,” nia tenik.
Governante ne’e garante nafatin respeita liberdade imprensa no respeita polítika editoriál husi mídia idak-idak nian, ho forma nafatin kria relasaun di’ak.
“Ita hotu hein katak ho apoiu ne’ebé Governu fó mídia mós bele haree ba bein estar kolega jornalista sira,” nia katak.
Sekretáriu Estadu iha biban ne’e husu ba mídia na’in sira ne’ebé asina akordu hodi serbisu hamutuk ne’e bele dezenvolve liután mídia.
“Mínimu ita-boot sira bele halo informasaun ne’ebé fó ba públiku ho kanál oinoin konvensionál ho plataforma sira ne’e informasaun ne’ebé bazeia ba faktus no informasaun ne’ebé kualidade, labele sai mídia ba rede sosiál, labele sai informasaun ne’ebé baze ba redes sosiál,” nia fó hanoin.
Nia iha esperansa, ho akordu ne’e na’in ba mídia no editór hotu husi mídia konvensionál no plaforma online bele nafatin kaer metin komprimisiu liberdade imprensa no kompromisu iha polítika mídia idaidak.
“Iha Governu sei la interven ba polítika editoriál nomós liberdade ne’ebé imprensa iha,” nia afirma.
Jornalista : Natalino Costa
Editora : Julia Chatarina
