BOBONAU, 26 Marsu 2026 (TATOLI)-Autoridade Munisípiu Bobonaru orienta ekipa iha Autoridade Postu no Diresaun Servisu Munisipál rekolla dadus sira kona-ba infraestrutura bázika sira ne’ebé hetan danus kauza husi dezastre naturál.
Tuir dadus ne’ebé Tatoli asesu, udan-boot foin lalais ne’e danifika Irrigasaun Maliana I, natar iha área Bilimau, postu administrativu Kailaku, irrigasaun Sordoli, iha postu Bobonaru, ponte Bulobu no estrada iha Saburai, Balibó, Tapó, Raiheu, Ilat-Laun no seluk tan.
“Administradór postu neen servisu munisipál sira relata katak besik fulan ida akontese udan-boot dalaruma irrigasaun hetan estragu, dalan ruma kotu ne’e inklui projetu sira. Karik iha problema ruma submete mai para ita relata ba nasionál”, Sekretariu Asuntu Planeamentu no Imvestimentu Integradu, Semedo Laco Costa, hateten.
Xefe suku Saburai, Abel Manu Mali, salienta katak nia parte submete ona pedidu normalizasaun ba estrada liga husi suku Saburai bá postu Administrativu Lolotoe ne’ebé hetan danus.
“Movimentu transporte susar. Ami husu atu konsidera pedidu ne’e atu responde ba iha tempu badak para fasilita komunidade asesu bá merkadu, saúde no atividade seluk tan”, nia dehan.
Komunidade Josefina de Jesus Lopes husu ba Governu atu konsidera mós estrada nasionál iha Balibó ne’ebé ameasa atu kotu, inklui estrada ligasaun Maliana Vila bá postu administrativu Bobonaru ne’ebé hetan danu iha área Lekhi-Achi Galusapulu.
“Balibó nia ne’e horisehik macet loos tanba estrada ida uluk aat nanis ne’e, horbainhira udan mai monu fali. Komunidade sira tau fatuk de’it, más karreta boot sira ne’e liu susar, tanba kloot loos. Ida ba Bobonaru nia ne’e ponte iha Galusaplu no estrada ne’e nakfera hotu, rai-halai. Se udan ne’e aumenta nia bele kotu totál”, nia realsa.
Notísia relevante: Rai-halai kauza danu ba estrada ligasaun Saburai-Lolotoe
Jornalista: Sergio da Cruz
Editora: Maria Auxiliadora
