KOVALIMA, 26 Marsu 2026, (TATOLI) – Empreza internasionál Timor Resources prepara ona ekipamentu hodi halo perfurasaun ba mina Feto Kmaus II ne’ebé lokaliza iha Aldeia Tabakolot, Suku Debos, Postu Administrativu Suai, Munisípiu Kovalima.
“Iha semana ne’e, ami bele hahú maibé tanba domingu agora Ramos, páskua hotu mak ami foin bele hahú atividade,” Jerente Empreza Timor Resources Filomeno Andrade, ko’alia iha salaun Autoridade Munisipál Kovalima, kinta ne’e.
Empreza Timor Resources prepara ona ekipamentu no pesoál ne’ebé servisu, sira hein de’it ona tanba ekipamentu preparadu ona.
Jerente Timor Resources husu komunidade fó rai hodi halo estrada hafoin halo preparasaun ba perfurasaun mina Feto Kmaus II iha munisípiu Kovalima.
Nia esplika, tékniku atu serbisu iha prosesu perfurasaun fahe ba faze rua; faze preparasaun uza tékniku enjeñeiru iha-ne’e no halo konstruisaun estrada atu halo perfurasaun mina.
“Ho nune’e daudaun ne’e empreza Timor Resources mobiliza ona ekipamentu atu halo perfurasaun, tanba kontratu halo ho local supply ita presiza karreta no ekipamentu sira seluk preparadu ona,” nia dehan.
Tuir dadus, família afetadu ba projetu konfirmasaun perfurasaun Feto Kmaus II hamutuk na’in-hitu ho orsamentu $46,865.60 ho total Área rai hamutuk 10,230 metru kuadradu.
Notísia relevante: Empreza Timor Resources indeminiza komunidade afetadu projetu perfurasaun Feto Kmaus II Kovalima
Jornalista:Celestina Teles
Editór: Evaristo Soares Martins
