MALIANA, 29 Marsu 2026 (TATOLI)–Bispu Dioseze Maliana, Dom Norberto do Amaral, hateten selebrasaun misa Domingu Ramus lori mensajen importante kona-ba domin, justisa no dame ne’ebé tenke sai hanesan dalan moris loro-loron nia ba ema hotu.
Bispu ne’e hateten, Jesus Kristus mai hanesan liurai ida-ne’ebé la hanesan ho liurai mundu nian, basá Nia la mai ho kbi’it ka podér maibé mai ho umildade no haraik-an, hodi hatudu dalan loos ba ema hotu.
Notísia Relevante: Domingu Ramos: haraik aan no hadomi malu mak dalan simu prezente hosi Jesus
“Nia mai, Nia hatudu ninia umildade, harai’k-an ida ne’ebé tomak, ne’ebé nia hakarak la’o tuir dalan ida-ne’e. Ne’eduni ema hotu haree no banati tuir hodi halo nia moris no moris ne’ebé oin seluk ho mundu nia lala’ok. Tanba mundu ida-ne’e Jesus tama no halo daudaun ne’e nakonu ho loko-an no foti-an ne’ebé lori ema ba de’it hetan susar, terus no mate, tanbaa loko-an no foti-an mak ukun, lori dez-orden, lori dez-armonia, lori justisa, lori ema han-malu, tetak-malu hanesan Busa ho Laho no buat sira seluk-seluk tan,” Dom Norberto hateten liuhusi omilia iha igreja pro-katedrál Maliana, ohin.
Amu Lulik ne’e hatutan, liuhusi Jesus moris no sakrifísiu iha krús, Jesus hatudu katak dalan loos mak domin, justisa no dame.
Segundu, Jesus ema-ne’ebé tuir dalan ne’e sei bele kria armonia iha família no sosiedade, moris ho domin no respeitu sei ajuda hamenus konflitu no hametin unidade entre ema sira.
Tanba, bispu ne’e bolu sarani sira atu prepara-an didi’ak ba Semana Santa ho laran moos no fiar metin.
Semana Santa la’os deit selebrasaun seremoniál, maibé tempu atu renova moris espirituál hodi sai ema-ne’ebé di’ak liután iha domin, justisa no dame.
“Ne’e duni sarani doben sira moris ba no haraik-an, umildade nia-laran hodi prepara-an didi’ak ba loron santu ne’ebé ita liu daudauk, hodi tama ba semana santa ne’ebé sai nu’udar simbolu ba ita nia moris di’ak tomak. Iha ne’ebé ita komemora, ita selebra misteriu Jesus Kristu nia mate no moris hi’as. Ne’eduni halo ho neon no laran tomak, ne’ebé ita tenke tama ho neon ho laran tomak moos, ho ida-ne’e mai ita ho neon ho laran ida de’it ,lori ita Na’i Jesus Kristu tama ba Jeruzalem,h odi hananu hamutuk no dehan ba Kristu mak ita nia liurai,” Dom Norberto hateten.
Notísia Relevante : Kuarezma: Momentu ne’ebé di’ak ba ita ho Ita-nia Maromak
Jornalista : Sergio da Cruz
Editór : Cancio Ximenes
