DILI, 30 Marsu 2026 (TATOLI)–Komandante Jerál (KomJer) Polísia NasionálTimor-Leste (PNTL), Komisáriu Asistente Polísia Afonso dos Santos, hateten, PNTL preparadu asegura selebrasaun Misa Semana Santa iha ámbitu Páskoa nian.
“Orientasaun Komandu nian sempre serbisu ho militár sira, laiha problema,” KomJer Afonso dos Santos hato’o ba Jornalista sira bainhira halo vizita ba Unidade Espesiál Polísia (UEP), Bairru Pite, Segunda ne’e.
Iha sorin seluk, Komandante Munisípiu Dili, Komisáriu Asistente Polísia Orlando Gomes, dehan, Komandu Munisípiu Dili hetan ona orientasaun husi Komandante Jerál atu koloka seguransa ba Páskoa, iha Kinta-Feira Santa, Sesta, Sábadu Aleluia no Domingu resorisaun.
“Ita prepara ona planu operasaun ba seguransa iha Festa Páskoa, ita koloka membru sira ba Igreja sira iha kapitál Dili nomós seguransa iha Igreja ne’ebé realiza prosisaun sira, atu nune’e bele asegura prosisaun sira ne’e la’o di’ak,” nia akresenta.
Iha Igreja sira kapitál Dili, liliu iha Parokia, tuir planu operasaun sei koloka membru Tránzitu sira atu organiza transporte sira atu labele iha engarrafamentu atu karreta sira hotu bele para ho di’ak.
“Planu ita prepara ona, ita breafing ona membru sira molok hala’o sira-nia serbisu iha terrenu. Tanba ne’e, iha Komandu Munisípiu Dili tinan-tinan ita sempre halo planu ba seguransa,” nia akresenta.
Notísia relevante : Selebra Páskoa, “Moris pasiénsia tuir idaidak nia fiar”
Planu operasaun ba Páskoa mós hetan apoiu husi Unidade Espesiál Polísia, Unidade Marrítima, nomós hetan apoiu parseiru hanesan Polisiamentu Komunitária.
“Ita orienta ona Eskudra sira atu fó hatene OPS (Ofisiál Polísia Suku) sira atu koordena ho Prezidente KPK, membru sira tomak para fó apoiu seguransa iha tempu Páskoa ninian,” nia katak.
Nune’e, Orlando Gomes apela ba sarani, joven no komunidade iha Munisípiu Dili atu prepara-an tanba lakleur tan tama ona ba Páskoa, tanba ne’e presiza kolaborasaun no kontribuisaun atu nune’e bele asegura seguransa iha Semana Santa bele la’o di’ak.
“Liliu Komandu Munisípiu Dili, husu ba joven sira ne’ebé mak dalaruma kalan ho motorizada kalan ho grupu, ita husu para atu hapara atu nune’e bele tau-atensaun di’ak ba loron Semana Santa, atu nune’e ita bele ultrapasa serimónia ho di’ak,” nia hato’o.
Komisáriu Asistente Polísia Orlando Gomes husu parte hotu atu kontribui ba estabilidade iha kapitál Dili.
“Ita-nia kapitál Dili la’ós Polísia mesak de’it, maibé husu ba povu, komunidade no joven sira, atu nune’e serbisu hamutuk ho Komandu Munisípiu liuhusi ita-nia Eskuadra, Ofisiál Polísia Suku sira atu nune’e ita hotu bele tau-atensaun para seguransa iha kapitál Dili ne’e bele la’o di’ak no susesu,” nia fó- hanoin
Molok tama Semana Santa Komandu Munisípiu Dili orienta ona ba Eskudra inklui Sesaun sira iha Komandu Dili atu molok tama ba Semana Santa ka Páskoa nafatin halo patrullamentu ho karreta no la’o ain ba bairru sira tu halo prevensaun ba konflitu sira ne’ebé mak mosu iha bairru-bairru sira.
“Dalaruma akompaña iha bairru-bairru mosu konflitu. Tanba ne’e, ita lansa ona ita-nia intelenjénsia sira no Ofisiál Polísia Suku sira, ko’alia ho ita-nia komunidade iha bairru sira atu halo patrullamentu atubele minimiza problema iha bairru sira,” nia katak.
Nune’e mós, Koamandante UEP, Superintendente Xefe Polísia Damião Correia, hateten, kona-ba seguransa ba Páskoa ne’e UEP sempre prontu apoia Komandu Munisípiu Dili hodi fó seguransa no estabilidade iha territóriu tomak, la’os iha kapitál Dili de’it.
“Iha kompañia ne’ebé iha kolokasaun iha Branvo ne’e e responsável ba parte leste nian, kompañia Delta ne’ebé responsável parte oeste nian, tantu RAEOA, ne’ebé iha kolokasaun permanente iha ne’ebá. Ita prontu ona hodi garante seguransa no estabilidade iha Páskoa,” nia hato’o.
Jornalista : Natalino Costa
Editora : Julia Chatarina
