BOBONARU, 30 Marsu 2026 (TATOLI) – Asembleia Postu Administrativu Lolotoe, submete lista kona-ba prioridade ualu ba Autoridade Munisípiu Bobonaru hodi bele diskute iha reuniaun Konsellu Koordenasaun Munisipál no haruka ba Governu sentrál atu konsidera no rezolve liuhusi orsamentu Planu Dezenvolvimentu Integradu Munisipál (PDIM) tinan 2027.
Prioridade sira ne’e halo liuhusi enkontru ASPA iha loron 26 de Marsu bazeia ba proposta husi suku hitu no setór relevante sira ne’ebé foka liu ba setór edukasaun, saúde, desportu no infraestrutura bazíka hanesan estrada rurál.
Notísia relevante: ASPA Bobonaru aprova programa prioridade sia ba 2027
“Ita-nia prioridade ualu iha segunda submete ona ba munisípiu”, Prezidente Postu Administrativu Lolotoe, Quintino de Jesus, dehan.
Lista sira ne’e mak konstrusaun barrajen hodi satán mota husi suku Lebos, konstrusaun postu saúde iha aldeia Atus, konstrusaun sala tolu iha Ensinu Báziku Filiál (EBF) Deudet, harii rezidénsia no muru protesaun ba postu saúde Piron, reabilitasaun sala tolu iha EBF Silagolo, loke estrada foun husi aldeia Anon bá Zoilpo, konstrusaun kampu futsál iha aldeia Tepa no salaun multiuzu.
Iha 2026, Loloto’e hetan projetu PDIM lima mak hanesan konstrusaun postu saúde Lontas ho valór rihun $78, reabilitasaun sistema bee-moos gravitasaun iha aldeia Silagolo, Dilai no Anon iha suku Lupal no Guda, ho valór osan rihun $180, konstrusaun merkadu Loloto’e (rihun $150), konstrusaun sala tolu iha EBF Ozo (rihun $72) no reabilitasaun ba kanalizasaun bee-moos iha aldeia Oceli (rihun $60).
Notísia relevante: Governu Austrália entrega Sentru Formasaun Braille ba EhD iha Bobonaru
Jornalista: Sergio da Cruz
Editora: Maria Auxiliadora
