Implementasaun PNDS 2026 iha Bononaru depende ba kondisaun klima
BOBONARU, 31 Marsu 2026 (TATOLI) – Projetu ba Programa Nasionál Dezenvolvimentu Suku (PNDS) sei implementa iha fulan-Abríl 2026, maibé depende ba kondisaun klima, tanba daudaun tempu udan sei kontinua, ne’ebé halo estrada ho ponte balun hetan danus no difikulta materiál bá lokál projetu.
Diretór PNDS Munisípiu Bobonaru, Rosário Mali, hateten katak semana kotuk halo ona enkontru no fornese ona kuotasaun ba fornesedór elijivel sira ne’ebé atu fornese materiál lokál no fabrikadu ba obra iha suku 50.
Notísia relevante: Orsamentu PNDS 2026 iha Bobonaru aloka ba obra 50 no projetu adisionál 18
“Prosesu aprovizionamentu la’o hela. Agora udan la fó tempu atu mobiliza materiál ba lokál. Dalan sira, liuliu iha Kailaku ne’ebé dalan no ponte kotuk, maibe projetu PNDS sei hahú iha Abríl konforme ba klima”, nia dehan iha salaun Maria Tapó.
Nia sublina katak, tuir planu, obra hotu-hotu sei finaliza iha fulan jullu 2026. Hodi fó hanoin ba komunidade atu kolabora ho di’ak ba implementasaun projetu, hodi evita situasaun ne’ebé halo projetu la la’o no orsamentu filafali ba kofre Estadu.
Tinan ne’e, Programa PNDS iha Bobonaru kontinua foka ba setór edukasaun, saúde, bee-moos no seluk tan ho orsametu alokadu hamutuk $1.817.330, hodi ezekuta ba obra regulár 50 iha kada suku, inklui obra adisionál 18 ho montante verba rihun $300 atu konstrui refeitóriu ba Programa Merenda Eskolár.
Notisia relevante: PAM Bobonaru husu ezekuta obra PNDS 2026 ho kualidade
Jornalista: Sergio da Cruz
Editora: Maria Auxiliadora
