OEKUSI, 31 Marsu 2026 (TATOLI) – Ohin, tersa-feira, loron 31 Marsu 2026, mandatu Autoridade tranzitória Rejiaun Administrativa Espesiál Oekusi Ambeno (RAEOA), ne’ebé lidera husi Prezidente Autoridade, Régio da Cruz Salu, termina ona mandatu, hafoin garantia funsionamentu administrasaun RAEOA durante fulan hitu, hahú husi 01 Setembru 2025 to’o 31 Marsu 2026.
Tanba ne’e, iha loron 26 Marsu 2026 ne’e, Governu liuhusi Ministeru Administrasaun Estatál (MAE), fó-sai ona karta ofisiál ida, ba Prezidente Autoridade RAEOA, atu informa ba Diretór Rejionál sira iha Oekusi, atu kontinua mantein kargu nu’udar Diretór Rejionál hodi hein desizaun husi Governu.
Notísia relevante:PA RAEOA simu ona karta husi Governu, mandatu sei termina iha 31 Marsu 2026
Karta ofisiál ne’ebé Ajénsia Tatoli,I.P, asesu, ho númeru referénsia 153/M.MAE/II/2026, loron 26 Fevereiru 2026 ho asuntu kontinuasaun funsaun Diretór Rejionál sira iha Oekusi.
“Senhor Prezidente, ha’u hato’o ba ita-bo’ot Exelénsia ha’u-nia kumprimentus aas liu. Hodi ezerse podér sira ne’ebé delega mai ha’u hosi lei númeru 3 hosi artigu 5 hosi Dekretu-Lei nú. 1/2026, loron 2 fulan-Fevereiru, ha’u husu atu Sua Exelénsia foti pasu atu informa ba Diretór Rejionál sira hotu kona-ba serbisu sira RAEOA katak, sira mantein iha kargu to’o desizaun diferente ida foti hosi autoridade supervizaun nian,” sita iha dokumentu ofisiál ne’ebé Ajénsia Tatoli,I.P asesu, iha tersa dadersan ne’e.
Notísia relevante:Posibilidade, nomeasaun estrutura definitiva RAEOA maioria Oekusi-oan
Iha karta ofisiál ne’e, asina direita husi Ministru Administrasaun Estatál (MAE) Tomas do Rosário Cabral ho koñesimentu husi Primeiru-Ministru (PM) Kay Rala Xanana Gusmão.
“Laiha asuntu seluk iha momentu ne’e, ha’u aproveita oportunidade ida-ne’e atu hafoun ha’u-nia kumprimentus di’ak liu,” afirma iha karta ofisiál ne’e.
Notísia relevante:Posibilidade, Kontratu Funsionáriu 1.500-resin iha RAEOA sei “hapara”
Rekorde fali katak, antes ne’e Prezidente Autoridade RAEOA simu ona karta husi Governu Sentrál, katak mandate nu’udar autoridade tranzitóriu sei termina iha loron 31 Marsu 2026, hodi Governu nomeia fali estrutura definitive atu garantia funsionamentu administrasaun Oekusi.
Antes ne’e, mós iha dokumentu ofisiál portál Governu deklara katak, Governu sei ezonera Prezidente no membru aautoridade RAEOA nian hahú iha 31 Agostu 2025 no nomea estrutura foun ida hodi garante kontinuidade administrasaun nian hahú iha 01 Setembru 2025.
Nune’e, Governu nomea estrutura husi kargu diresaun no xefia sira iha Rejiaun Administrativa Espesiál Oekusi Ambenu (RAEOA) mak hanesan:
Domingos Punef asume knaar nu’udar Diretár-Jerál Rejionál; José Tanessib Anuno nu’udar Diretór Rejionál Administrasaun; Augusto de Fátima Efi nu’udar Diretór Rejionál Planeamentu no Aprovisionamentu; Amâncio Aguido Punef nu’udar Diretór Rejionál Finansas.
Merita Marques Caunan Lafo nu’udar Diretora Rejionál Saúde; Vicêncio Cono nu’udar Diretór Rejionál da Edukasaun no Solidariedade Sosiál, José Oki nu’udar Diretór Rejionál Agrikultura; Orlando Quelo nu’udar Diretór Rejionál Komérsiu no Indústria.
Nune’e mós Governu nomea Remígio Nuno Sila nu’udar Diretór Rejionál Infraestruturas; Domingos de Almeida nu’udar Diretór Rejionál Transporte no Komunikasaun; Carlos de Fátima de Almeida nu’udar Diretór Rejionál Juventude no Desportu; Anastásia Eni nu’udar Diretora Rejionál Turizmu, Arte no Kultura; José Ase Neno Colo, nu’udar Diretór Rejionál Terras no Propriedade no Herculano de Sousa mak asume kargu hanesan Koordenadór ba Implementasaun Zona Ekonómika Espesiál Dezenvolvimentu Oekusi Ambenu (ZEEDOA).
Jornalista: Abílio Elo Nini
Editór: Rafael Ximenes de A. Belo
