DILI, 01 Abríl 2026 (TATOLI) – Ekipa konjunta husi Ministériu Justisa (MJ) no parte relevante daudaun halo hela levantamentu dadus kona-ba uza propriedade investimentu Pelican Paradise iha Tíbar molok aprezenta ba Konsellu Ministru (KM) hodi fó notifikasaun hodi hapara investimentu.
Ministru Justisa, Sérgio Hornai, hateten katak iha ona desizaun nivel polítika no hein rekolla informasaun husi Diresaun-Jerál Terra no Propriedade iha Unidade Arrendamentu Bens e Moveis Estadu, ministériu relevante hanesan Komérsiu no Indústria, no Ministériu Koordenadór Asuntu Ekonómika.
Sérgio Hornai hateten iha Palásiu Governu katak desizaun ofisiál hapara investimentu Pelican Paradise foti liuhusi Konsellu Ministru no bele mós ministériu responsavel mak fó notifikasaun. “Maibé, hanoin desizaun foti iha Konsellu Ministru ida-ne’e di’ak liu tanba uluk mai ho natureza ida atu halo planeamentu investimentu ho ninia karáter ida espesializada”, katak.
Maski Pelican Pardise husu Governu atu kompleta Akordu Investimentu Espesiál kona-ba bee no eletrisidade hafoin deklarasaun polítika Governu dehan hapara investimentu. Tuir nia, ida-ne’e sira-nia razaun própriu maibé hothotu akompaña saida mak sira halo ona iha Tíbar.
“Ita sériu iha jestaun kona-ba rai, ita tenke iha seriedade ba ida-ne’e. Se dehan labele tenke labele. Ita tenke hola desizaun hapara tanba Estadu ne’e iha autoridade para deside, maibé la’ós arbiru. Tenke iha desizaun ida tetu ba buat hothotu tanba se projetu ne’e la’o ita ba impede halo saida. Ita nafatin iha sériu atu haree sasán sira Estadu nian”, nia afirma.
Notísia relevante: Pelican Paradise klarifika kanselamentu projetu no reafirma ba kompromisu AIE
Jornalista: Arminda Fonseca
Editora: Maria Auxiliadora
