MALIANA, 02 Abríl 2026 (TATOLI) – Bispu Dioseze Maliana, Don Norberto do Amaral, hato’o mensajen xave tolu iha selebrasaun Misa Kinta-Feira Santa ne’ebé marka inísiu Tridun Paskál: signifikadu fase ain, sentidu Eukaristia nian, fase no importánsia sakramentu saserdósiu.
Iha ninia omília, bispu subliña katak Jezús nia hahalok fase apóstolu sira-nia ain nu’udar símbolu haraik-an, domin no serbí ema seluk. Liuhusi aktu ne’e, Jezús hanorin sarani sira atu serbí no hadomi malu ho laran tomak.
Notísia relevante: Bispu Maliana: Jezús mai nu’udar naroman, domin no dalan ba salvasaun
“Jezús foti hahalok fase ain ida-ne’e hasesan dalan ida ba purifikasaun nian. Ne’e duni Na’i dehan imi moos ona, maibe la’os hotu-hotu basá nia hatene sé mak atu saran nia ba mate, Judas Iscariotes, hotu tiha ida-ne’e nia fila hik’as fali ba nia fatin hodi dehan imi hatene Ha’u mestre, Ha’u mai duni, Ha’u mestre fase imi nia-ain, imi mos sei halo hanesan ne’e ba malu”, bispu hato’o iha nia omília.
Nia mós hateten katak fase ain tenke sai prátika iha moris iha espíritu domin nian, la’ós de’it liuhusi liafuan maibé mós hahalok konkretu iha moris loroloron nian.
Bispu esplika katak Eukaristia nu’udar memoriál sakrifísiu Jezús Kristu nian, ne’ebé saran nia isin no raan ba salvasaun umanidade nian. Nia subliña Eukaristia nu’udar sentrál ba vida fiar katólika no tenke simu ho fuan ne’ebé moos no fiél.
“Nia domin laiha medida. Nia fó nia isin atu ema han no nia raan nakfakar fase ema hotu nia sala. Bainhira ema bá han hamutuk eukaristia, ema halo hodi hanoin Na’i Jezús nia mate”, nia afirma.
Bispu mós destaka importánsia sakramentu saserdósiu nian nu’udar meiu ida ba Kreda nia servisu liu husi padre sira hodi sai ponte liga sarani sira ho Maromak.
Iha okaziaun ne’e bispu mós fó hanoin ba sarani sira atu evita atitude sira ne’ebé la reflete domin loloos no kontinua haka’as-an atu hadi’a moris ne’ebé hakmatek.
Selebrasaun Kinta-Feira Santa sai momentu importante ida ba kongregasaun atu reflete kona-ba signifikadu husi Jezús Kristu nia sakrifísiu no domin no atu aplika valór sira ne’e iha moris loroloron.
Notísia relevante: Dom Noberto husu sarani sira hadomi-laran metin ba Dioseze Maliana
Jornalista: Sergio da Cruz
Editora: Maria Auxiliadora
