Dom Noberto husu sarani sira hadomi-laran metin ba Dioseze Maliana
BOBONARO, 30 janeiru 2025 (TATOLI)—Bispu dioseze Maliana, Dom Norberto do Amarál, husu ba sarani sira atu kontinu hadomi no laran-metin ba dioseze Maliana hodi lao hamutuk hanesan ahi-oan ne’ebé naroman leno ema hotu atu moris tuir dalan Maromak nian.
Prezidente Komferénsia Episkopál Timorense ne’e hato ó agradesimentu ba sarani sira hotu, tanba dioseze Maliana hamirik ho buat ida laiha ka mamuk, maibé nafatin la’o hamutuk ho sarani sira lori terus to’o ohin loron sai di’ak.
Notísia Relevante: Xanana entrega estatua Na’i-Feto hosi Portugal ba Dioseze Maliana
“Mai ita hamutuk nafatin hodi la’o ba oin, hamutuk nafatin iha domin hodi hala’o ita-nia moris nuúdár sarani iha dioseze Maliana. Ita seidauk halo buat barak ida, ita hein la’o ho nia tempu mak ita bele deteta buat sira-ne’ebé ita sei hala’o. Mai ita reza ba Maromak ba buat sira-ne’e hotu ita simu ona hodi husu bensaun ba buat sira-ne’ebé ita seidauk hala’o. Atu loron ida bele sai kompletu liután hodi hatudu katak ita-nia domin ba dioseze, domin ida-ne’ebé boot no kle’an tebes,” Dom Noberto hateten liuhusi nia omilía iha selebrasaun misa ezisténsia Dioseze Sagrada Coracao de Jesus Maliana ba da-15 no abertura tinan Jubileu iha igreja Santa Cruz Maliana, kinta ne’e
Nia hatutan, Dioseze Maliana hamriik ho diosezanu na’in-12, relijiozu 18 maibé ohin loron diosezanu aumenta ba 33, komunidade 35. Signifika katak dioseze Maliana komesa habelar iha moris loro-loron nian, hodi hahú hamoris no hala’o nafatin dioseze ida-ne’e ninia moris loloos.
Buat sira-ne’e alkansa durante ne’e, nia hateten, mai husi esforsu no kolaborasaun ema hotu nian to’o ohin loron, tanba domin ba Dioseze Maliana.
“Ba ita-boot sira hotu ne’ebé hola parte iha Dioseze Maliana ne’ebé halo tinan 15, ita hamriik nu’udar dioseze ida, ita mesak naroman uitoan hahú husi buat ne’ebé ita laiha, mamuk, ita la’o mós atu monu sala-sala de’it. Maibé, ho fiar boot, ita hahú la’o neineik to’o ohin loron, maske iha nakukun nia laran. Nakukun labele ukun ita, tan ita mesak naroman nia-oan. Ne’ebé, fiar iha Maromak nia laran luak no laran di’ak, ita la’o to’o ohin loron ida-ne’e, moris ho moris ida ne’ebé di’ak,” nia dehan.
Vigário Jerál Dioseze Maliana, Pe. Lucio Norberto de Deus, reforsa tinan 15 dioseze Maliana hanesan ema ida karik tama daudaun ona idade joven ne’ebé konsege halo ona progresu balun, maibé presiza halo tan buat lubun ida tanba sei enfrenta limitasaun barak
“Ita sei hasoru dezafiu barak maibe presiza enerjía para ita atu hala’o. Ne’eduni, selebrasaun tinan 15, selebrasaun ida merese duni atu ita selebra, selebrasaun ida soi duni ba ita hotu atu ita hamutuk hanoin viajen nu’udár sarani iha dioseze ida-ne’e,” nia hateten.
Dioseze Maliana nu’udár dioseze datoluk iha Timor-Leste nian ne’ebé eziste iha 30 janeiru 2010 ho nia Bispu primeiru Dom Norberto do Amarál ne’ebé nomeia husi Santo Padre Bento XVI no Dioseze Maliana kobre Munisípiu tolu hanesan Liquisa, Bobonaro no Covalima.
Notísia Relevante: Dioseze Maliana apoia $1.000 ba vítima inséndiu iha Tapo-memo
Jornalista : Sérgio da Cruz
Editór : Cancio Ximenes
