OEKUSI, 07 Abríl 2026 (TATOLI) – Tuir planu husi Komandu FALINTIL-Forsa Defeza Timor-Leste (F-FDTL), sei instala tan postu foun komponente terrestre tolu iha sub-rejiaun Oésilo, Pássabe no Nítibe, hodi hakbesik liután serbisu forsa nian ba komunidade sira área rurál.
Tanba ne’e, iha tersa-feira ohin ne’e, Xefe Estadu Maiór Forsa Armada Timor-Leste, Brigadeiru Jenerál José da Costa Soares “Trix” hala’o enkontru koordenasaun ho Autoridade Rejiaun Administrativa Espesiál Oekusi Ambeno (RAEOA) liuhusi Diresaun Rejionál Terra, Propriedade, ba futuru bele fasilita rai.
“Ohin ami mai hasoru autoridade RAEOA atu apoia hela rai, ba instalasaun postu F-FDTL foun tolu iha Oésilo, Pássabe inklui Nítibe,” nia hateten ba jornalista Oekusi, ohin.
Autoridade seguransa ne’e, afirma, durante enkontru koordenasaun ne’e, autoridade RAEOA liuhusi Diresaun Rejionál Terra, Propriedade, disponível no apoia tebes atu kolabora ho Komandu F-FDTL atu indika fatin ruma.
“Enkontru ohin ne’e, akompaña ho xefe suku sira ho diretór rejionál sira hotu, ohin ko’alia ona iha posibilidade atu oferese rai, hodi apoia forsa kona-ba rai,” nia hateten.
Notísia relavante:Autoridade oferese jardín Oébau ba Komponente Navál atu proteje rikusoin tasi
Diretór Diresaun Rejionál Terra Propriedade, José Ase Neno Colo, konfirma, autoridade sei koopera ho autoridade lokál sira iha sub-rejiaun Oésilo, Pássabe, Nítibe no Pante Makasar, atu indika rai, nune’e fasilita F-FDTL serbisu besik liután komunidade sira iha área rurál.
“Koordenasaun ohin ne’e, ita sei tuun direita ba terrenu, tanba intensaun husi forsa sira atu instala tan postu F-FDTL iha sub-rejiaun haat hodi hakbesik liután ba komunidade sira, ne’ebé ita kontribui tanba ne’e institisaun Estadu, entaun autoridade RAEOA liuhusi terra, propriedade sei fasilita kualker atividade Estadu nian, tanba F-FDTL importante tebes kuandu sira presiza rai, ita tenke fasilita atu sira bele serbisu ho avontade,” nia hateten.
Notísia relavante:Autoridade oferese rai ba UPM destaka postu vijilánsia iha Sakato-Citrana
Observasaun Jornalista Ajénsia Tatoli,I.P, hafoin enkontru koordenasaun ekipa husi Diresaun Terra, Propriedade akompaña Komandu F-FDTL tuun kedas ba terrenu, liliu Oésilo Pássabe no Nítibe hodi observa fatin instalasaun postu foun F-FDTL nian.
Rekorde fali katak, daudaun ne’e komandu estabelese ona postu rua iha sub-rejiaun Makasar, hanesan komponente Terrestre lokaliza iha Sikone suku Lalisuk no komponente Navál iha Oébau.
Notísia relavante:Komponente Terrestre Sikone Oé-Cusse presiza karreta
Jornalista: Abílio Elo Nini
Editór: Rafael Ximenes de A. Belo
