DILI, 08 Abríl 2026 (TATOLI)–Igreja liuhusi Konferénsia Episkopál Timorense (CET) ho Dioseze Baukau, Dili no Maliana, Kuarta ne’e, asina nota entendimentu ho Governu liuhusi Vise-Primeiru-Ministru no Ministru Koordenadór Asuntu Sosiál no Ministru Dezenvolvimentu Abitasaun Rurál, Mariano Assanami Sabino, hodi hala’o atividade Igreja Katólika iha tinan 2026.
“Ita asina akordu anuál ba subvensaun públiku ba CET. Subvensaun ne’e ita fahe ba parte haat, ida mak edukasaun ne’e tau 40%, rua ba sosiál tau 30%, Governu inkluziál ne’e 20% no administrasaun nian 10%. Ida-ne’e mak ita fahe ba parte haat hosi subvensaun públiku hamutuk millaun $15,” Bispu Dioseze Baukau, Don Leandro Maria Alves, hato’o iha Gabinete Vise-Primeiru-Ministru, iha Palásiu Governu.
Notísia relevante : CET utiliza subvensaun millaun $15 ba item tolu importante
Don Leandro informa, persentajen ba edukasaun sei atribui ba nível eskolaridade, edifísiu eskola sira inklui ba profesór sira.
“Millaun $15 ne’e nia ezekusaun hanesan iha Dioseze tolu ne’e. Millaun $15 ne’e tulun ida-ne’ebé mak Governu oferese tanba ita hatene Igreja hala’o knaar iha parte boot. Tanba hanesan edukasaun ne’e Igreja halo knaar boot iha ne’ebá. Entaun, ida-ne’e bele hatán ona nesesidade Igreja nian,” Amu Bispu Baukau tenik.
Nune’e mós, Vise Primeiru-Ministru no Ministru Koordenadór Asuntu Sosiál no Ministru Dezenvolvimentu Abitasaun Rurál, Mariano Assanami Sabino, hateten apoia ne’e atu reforsa atividade ne’ebé Igreja iha.
“Apoiu ne’e hanesan kompromisu ida-ne’ebé Governu iha hodi apoia CET. Igreja la’ós hanesan fiar ida, maibé Igreja halo parte mós ba luta libertasaun nasionál,” Assanami dehan.
Jornalista : Osória Marques
Editora : Julia Chatarina
