DILI, 01 Abríl 2026 (TATOLI)—Arsebispu Arkiodioseze Metropolitana Dili, Don Virgílio Kardeál do Carmo da Silva, informa Konferénsia Epikopál Timorense (CET-sigla portugeza) utiliza subvensaun millaun $15 ba item tolu importante iha Dioseze Baukau, Dili no Maliana.
“Subvensaun públika ne’ebé mak tinan-tinan no to’o agora , Governu fó ba uma-kreda bazeia ba proposta orsamentál ne’ebé mós epesikopál tinan-tinan hatama ba Governu. Proposta orsamentál ne’e iha item tolu mak importante. Dahuluk, edukasaun, daruak mak servisu sosiál no ikus mak Governu Igreja nian. Entaun, ko’alia kona-ba edukasaun liga ba formasaun jerál, amu-lulik sira-nia formasaun ba seminarista sira-nian no eskola katólika sira. Agora servisu sosiál ko’alia kona-ba harii eskola kapela, asisténsia sosiál sira seluk no Governu Igreja nian mak ko’alia kona-ba tau-matan ba ema ne’ebé mak responsabilidade ba ema ne’ebé mak halo sira-nia servisu,” Don Virgílio Kardeál hateten ba jornalista sira iha salaun CET, Kuarta ne’e.
Arsebispu Arkiodioseze Metropolitana Dili dehan item tolu mak tinan-tinan CET hatama ba Governu no antes atu hetan subvensaun foun sei hatama fali relatóriu ba sosiadade sivil no mós ba nusiantura kona-ba avaliasaun sira.
“Osan millaun $15 labele kobre hotu ba dioseze tolu ne’e. Loos duni públiku kestiona dehan koa’lia kona-ba burokrasia, sertidaun karun ne’e maibé dezde iha tinan hirak liubá Konferénsia Episkopál hasai ona regrra ida ba parókia no dioseze hotu hodi hakruuk ba regra ida. Entaun, presu sertidaun nian mak ho $5, la liu ida ne’e no laiha ida mak halo urjente,” Bispu Virgílio hatán.
Kardeál dehan públiku kestiona presu ne’e dalaruma mosu abuzu ruma iha fatin. “Ami rekoñese ida-ne’e, tanba dioseze tolu ne’e mai ho nia parókia hamutuk 70-resin. Dalaruma akontese abuzu ruma, entre sarani ho ema ne’ebé servisu iha kartóriu,” Amu Bispu esplika.
Kona-ba burokrasia, Bispu Virgílio akresenta la’ós kazu hotu-hotu tenke ba dioseze maibé iha kazu ruma ne’ebé presiza verifika liliu kona-ba autensidade dokumentu tanba dalabarak mosu iha falsifikasaun dokumentu barak.
“Tanba ema barak mai liuhosi kartóriu sira atu halo falsifikasaun dokumentu, tanba razaun ida-ne’e, ida-ne’ebá, entaun ho ida-ne’e dioseze labele deside kedas iha tempu ne’ebá. Maibé, iha autoridade igreja ne’ebé liuhosi nia sanseleria fó razaun ba sira, oinsá atu muda ne’e, bele muda ka lae, ne’e sanseleria mak deside. Parókia labele halo mudansa ba ema nia naran, data moris sira, tinan moris. Presiza liuhosi kada dioseze nia sanseleria nian,” Kardeál subliña.
Jornalista: Osória Marques
Editór: Xisto Freitas da Piedade
