DILI, 08 Abríl 2026 (TATOLI)-Komisaun A iha Parlamentu Nasionál (PN), ne’ebé Trata Asuntu Konstituisionál no Justisa, ohin hahú halo audiénsia públika hodi rona opiniaun husi proponente sira ba alterasaun Lei Eleitorál bá PN, Lei Eleitorál Munisipál no Lei Órgaun Administrasaun Eleitorál.
Audiénsia ne’e partisipa husi proponente sira ne’ebé mai husi bankada parlamentár Partidu Kongresu Nasionál Rekonstrusaun Timorense (CNRT, sigla portugés), Partidu Demokrátiku (PD, sigla portugés) no Kmanek Haburas Unidade Nasionál Timoroan (KHUNTO).
Prezidente Komisaun A, Natalino dos Santos, informa objetivu husi alterasaun ne’e hodi halo ajustamentu ba pakote lei tolu ne’e, liuliu haree kona-ba kompozisaun órgaun eleitorál sira-nia kompeténsia ho nia mandatu.
Liga ho Lei Eleisaun Munisipál no Lei Eleitorál ba Parlamentu iha ajustamentu ne’e haree kona-ba koligasaun partidu polítiku sira, tanba eleisaun munisipál sei hala’o iha kada munisípiu ne’ebé tuir síklu eleitorál.
“Tanba ita hatene iha 2027, iha eleisaun podér lokál, entaun presiza iha ajustamentu pakote tolu ne’e,” nia hateten hafoin ramata audiénsia iha PN, ohin.
Nune’e tuir ajenda PN nian, Komisaun mós sei halo audiénsia ho entidade relevante sira seluk ba lejizlasaun ne’e. Hafoin audiésia públika, PN sei debate detalla kona-ba diploma ne’e iha sesaun plenária no diskusaun klean sei akontese iha faze espesialidade.
Lembra katak reuniaun plenária PN iha loron 24 Marsu,meza anunsia no baixa ona projetu lei númeru 16/VI/(3a)-alterasaun dahaat Lei númeru 5/2006, loron 28 Dezembru, Órgaun Administrasaun Eleitorál, alterasaun dalimak lei númeru 6/2006, loron 28 Dezembru, Lei Eleitorál ba PN no alterasaun dahuluk lei númeru 22/2021, loron 04 Novembru, Lei Eleitorál Munisipál ba Komisaun A hodi halo apresiasaun inisiál.
Lei Eleitorál mak regula eleisaun deputadu ba PN no Lei Eleitorál Munisipál regula eleisaun Prezidente Munisípiu, Vise-Prezidente Munisípiu no deputadu asembleia munisipál.
Notísia relevante:Komisaun A komesa diskute kalendáriu ba alterasaun Lei Eleitorál no Eleisaun Munisipál
Jornalista: Nelson de Sousa
Editora: Isaura Lemos de Deus
