OEKUSI, 09 Abríl 2026 (TATOLI) – Ekipa Komisaun ida husi Ministériu Administrasaun Estatál (MAE), kinta ne’e rekolla ona dadus kona-ba prosedimentu administrativu no mapa pesoál forsa traballu iha Rejiaun Administrativa Espesiál Oekusi Ambeno (RAEOA) hodi prepara ba futuru estabelesimentu estrutura definitiva ba Oekusi.
Notísia relevante:PA RAEOA simu ona karta husi Governu, mandatu sei termina iha 31 Marsu 2026
Diretór Nasionál Apoia Administrasaun Suku (DENAAS) iha MAE, Celestinho Martinho Marques, informa, desizaun ne’e, orienta husi Ministru Administrasaun Estatál (MAE), ho despaisu númeru referénsia 20/III/MAE/2026.
Atuál Prezidente Autoridade RAEOA interinu ne’e esplika, iha despaisu ne’e, kria komisaun ida ba RAEOA, hodi hala’o serbisu ba asuntu rua, primeiru atu rekolla dadus relasaun ho prosedimentu administivu ezisténte atuál iha RAEOA, daruak rekolla mós dadus kona-ba mapa pesoál forsa traballu atuálmente iha RAEOA liliu Curiculum Vitae (VC).
“Komisaun ida-ne’e mai atu hala’o misaun rua ne’e, sei halo intervista no konfirmasaun ho dirijente sira-ne’ebé identifikadu, karik ho xefia ruma, sira sei sai koresponden ba iha serbisu komisaun nian, sei bolu idak-idak mai atu halo intervista ho komisaun sira,” nia hateten iha salaun administrasaun Numbei, ohin.
Diretór Nasionál ne’e, esplika, ekipa komisaun ne’e sei hala’o serbisu iha RAEOA durante loron 14, bainhira konklui sei relata direitamente nia rezultadu ba Ministru Administrasaun Estatál (MAE) molok define estrutura definitivu ba RAEOA.
Notísia relevante:Alterasaun Estatutu RAEOA garante transparánsia ba dezenvolvimentu rejionál
Diretór Jerál Rejiaun Oekusi, Domingos Punef, afirma, nu’udar servidór Estadu tenki kumpre ba orientasaun Governu, nune’e bele kualifika prosesu administrasaun tuir regra.
“Rekolla dadús, ne’e ordén husi Governu Sentrál, tenki prepara dirijente no kargu xefia sira-ne’ebé, iha poténsia ne’ebé di’ak, ne’e mak rekolla dadus liliu Curiculum Vitae, ne’e importante atu deside ida-ne’ebé maka liu husi selesaun ida, tenki kompleta dokumentu sira-ne’e, ne’ebé ha’u fiar katak, rekolla dadus sira-ne’e atu hadi’a prosesu administrativa tuir regra la’ós mai atu buka ema nia frakeza,” nia hateten.
Notísia relevante:Última hora: Governu nomeia Celestinho Marques substitui PA RAEOA
Ekipa ne’ebé hala’o intervista, komposta husi Diretór Jerál sira iha MAE, Sekretáriu Exekutivu PNDS no Diretór Nasionál sira iha MAE.
Jornalista: Abílio Elo Nini
Editór: Rafael Ximenes de A. Belo
