BOBONARU,10 Abríl 2026 (TATOLI)- Komunidade husu Governu atu aselera prosesu administrasaun ba projetu reabilitasaun estrada urbana trosu Mau-Mali, Postu admistrativu Maliana liga ba to’o Bilimau, Postu Administrativu Kailaku, Munisípiu Bobonaru nune’e bele fó benifísiu tanejivél ba komunidade sira.
Jeferino Loco Bere, Xefi Suku Manapa, afirma katak to’o agora komunidade no autoridade lokál sira hein hela klareza kona-ba projetu estrada Kailaku.
Nia haktuir katak maske informasaun ne’ebé simu indika prosesu ne’e tama ona iha faze finál, maibé kontratu projetu seidauk asina.
Notísia Relevante:IGEADI normaliza estrada Kailaku bá Bilimau
“Ami komunidade ho Autoridade lokàl Kailaku, rona ne’e dehan estrada Kailaku, tempu badak maibe to’o agora seidauk asina kontratu. Ami lahatene bainhira los, ami rekomenda ba governu se bele aselera tiha prosesu ne’e para bele kontinua estrada Mau-Mali ba to’o Bilimau, para ami komunidade senti kontenti no ami mós sei asesu ba dalan di’ak,” nia informa ba jornalista sira iha terrenu, Sesta ne’e.
Xefe suku ne’e afirma, ezijensia ne’e hato’o tanba tinan barak povu infrenta problema estrada la di’ak no ponte sempre kotu.
“Ponte ida Bulobu ne’e tinan-tinan IGE mai normaliza, mais kotu nafatin, no foin lais sira hadi’a tiha, tau kontainer ho rai-henek, mais ne’e mos nafatin la dura, tanba udan mai rai-henek sira namtate hodi no a’at fali deit. Ho nue’e presiza ponte foun para ami bele halo movimentu ho di’ak,” nia dehan.
Jeferino garante sei laiha inteferensia no impedimentu ruma ba implementasaun projetu ne’e hanesan akontese tinan hirak liubá.
Notísia Relevante:Kondisaun estrada iha Kailaku provoka aumenta moras IRA no afeta komunidade
“Ami xefe suku nain ualu ho Administradór Postu, hamutuk ho Intelektuál no joven sira prontu atu apoia 100% ba kompaña ne’ebé atu implementa projetu ne’e. Ami prontu atu kontribui, ami garante laiha intervensaun tan, se karik akontese ami sei foti asaun ida ba ema ne’ebé mak atu impede ne’e,” nia realsa.
Entretantu, Administradór Postu Administrativu Kailaku, Rodolfo da Cruz, rekoñese projetu ne’e iha ona faze finál. Maibé, seidauk iha serteza kona-ba empreza ne’ebé maka sei manán konkursu.
“Mais povu Kailaku iha esperansa nafatin, no hein hela estrada ne’e para bele hetan lansamentu lalais,” nia dehan.
Enkuantu iha fulan kotuk Ministru Planeamentu Imvestimentu Estratejíku, Gastáo de Sousa, konfirma reabilitasaun estrada urbana trosu husi Mau-Mali ba Kailaku ho distania kilometru 26 iha ona prosesu aprovizionamentu finál.
Jornalista : Sergio da Cruz
Editora : Armandina Moniz
