DILI, 10 Abríl 2026 (TATOLI)–Ministériu Edukasaun (ME) hamutuk Governu Koreia liuhusi Ajénsia Kooperasaun Internasionál Koreia (KOICA), Sesta ne’e, halo sorumutu hodi ko’alia kona-ba kooperasaun ba setór edukasaun.
“Ministériu Edukasaun iha kooperasaun ho Governu Koreia liuhusi KOICA iha área haat atu fó apoiu ba eskola sekundáriu tékniku vokasionál iha Bekora, sira mós tau ekipamentu iha ne’ebá, maibé kooperasaun boot tebes. Sira ajuda harii sentru impresaun kompleta ho mákina hotu,” Ministra Edukasaun, Dulce de Jesus Soares hato’o ba Jornalista sira, iha salaun ME, Vila-Verde.
Ministra dehan, liuhusi kooperasaun ida-ne’e mak KOICA fó apoiu ba pré-eskolár no asina ona akordu ida liuhusi UNICEF, ne’ebé sira sei halo konstrusaun ba eskola 14 iha Munisípiu Aileu, Baukau, Kovalima no Lautein.
Notísia relevante : Governu autoriza Ministra Finansa asina akordu subvensaun rua ho KOICA
Governante ne’e hateten, vizita ne’e fó oportunidade atu haree filafali kooperasaun atuál hodi hadi’a kualidade edukasaun iha nasaun tomak.
Nune’e mós, Embaixadór Repúblika Koreia, Chang Ha Yeon, hatutan, enkontru ohin hodi ko’alia kona-ba projetu KOICA nian iha Timor-Leste. Liliu iha treinamentu nian.
Nune’e, Embaixada no KOICA sei haree atu buka dalan ho ME atubele implementa projetu hodi la’o ho susesu iha Timor Leste.
“Ohin ha’u hasoru malu ho Ministra Edukasaun hodi ko’alia kona-ba KOICA nia programa sira-ne’ebé la’o hela iha Timor-Leste no atu rona ministériu nia hanoin kona-ba oinsá atu aliña inisiativa sira iha futuru,” Embaixadór Chang Ha Yeon, katak.
Jornalista : Osória Marques
Editora : Julia Chatarina
