DILI, 13 Abríl 2026 (TATOLI)—Autoridade Nasionál Lisensiamentu Ambientál (ANLA) ezekuta ona 25% Orasamentu Jerál Estadu (OJE) 2026 iha trimestre dahuluk, hahú husi fulan-Janeiru to’o Marsu.
“Husi ezekusaun ne’e ami halo ba atividade sira hanesan avaliasaun, inspesaun, kustu viajen”, Prezidente ANLA, Maximiano de Oliveira, informa ba Agência Tatoli iha nia kna’ar fatin, ohin.
Nia dehan, haree fali ba sira-nia despeza ne’e orsamentu tutela husi Ministériu Turizmu no Ambiente (MTA) entaun sira iha kompeténsia haree de’it ba persentajen ezekusaun nian.
“Relasiona ho reseita ne’ebé ami rekolla iha tinan 2026 hamutuk rihun $9.800, ne’ebé kobre husi lisensimentu ambientál ba projetu kategória A ida (1), kategória B iha neen (6) no kategória C hamutuk 69, totál hamutuk 76 lisensiamentu ambientál,” nia dehan.
Enkuantu, nia hatutan, kategória lisensiamentu sira-ne’e kompostu husi konstrusaun, otelária, agua saneamentu, fábrika, indústria, ofisina no restaurante.
Orsamentu Jerál Estadu (OJE) 2026 ne’ebé aloka ba ANLA hamutuk $127.606,00, ne’ebé kompostu husi atividade formasaun AIA prevee $20.000 no atividade emite lisensa prevee $107.606.00, enkuantu kona-ba saláriu vensimentu la inklui tamba orsamentu tutela ba Ministériu Turizmu no Ambiente (MTA).
Jornalista : Alexandra da Costa
Editór : Cancio Ximenes
