DILI, 13 Abríl 2026 (TATOLI)–Komandante Unidade Polísia Marrítima (UPM), Superintendente Xefe Polísia Eugénio Pereira, hateten, Empreza Bibora Ataúro Express finaliza ona manutensaun Ró UPM Lusitania.
Manutensaun ró hahú iha loron 08 Novembru 2024 no kustu ba manutensaun ho montante $250.000 husi Orsamentu Jerál Estadu (OJE) 2024.
“Manutensaun hotu ona, ita iha ona finalidade no tantu mós prosesu kona-ba administrativu liga ho pagamentu ho buat sira ne’e hotu ona, agora filafali ba jestaun unidade atu haree kona-ba kolokasaunefetivu, aumezmu tempu haree kona-ba sistema operasionalizasaun ba atividade operasionál sira,” Eugénio Pereira hato’o ba Jornalista sira iha Seonál Lesidere, Segunda ne’e.
UPM daudaun ne’e seidauk define númeru membru efetivu ne’ebé sei koloka iha ró ne’e nia laran.
“Oinsá atu haree estrutura ró ne’e rasik, haree ba sira-nia navegasaun, divizaun ka sesaun hodi tau-matan ba mákina husi ró ne’e, liuliu haree liu ba serbisu tékniku sira,” nia akresenta.
Notísia relevante : UPF-TNI halo kooperasaun servisu hodi kontrola fronteira
Hafoin empreza ba manutensaun ró ne’e finaliza ona nia serbisu, Ró Lusitania Express halo ona teste bá-mai Ataúro-Dili.
“Foin daudaun atividade Sua Eselénsia Prezidente Repúblika nian kona-ba resesaun Diplomata Unidade Polísia Marrítima hetan mós orientasaun husi Komandu liuhusi proposta husi Kaza Militár Prezidénsia Repúblika, purtantu Unidade Polísia Marrítima apoia atividade Prezidente Repúblika nian,” nia katak.
Ró patrullamentu Lusitania Express ne’e halo nia navegasaun iha área kosteira iha parte súl, maibé ne’e depende ba klima, maibé daudaun Komandu UPM sei haree hela parte jestaun ró ne’e oinsá ba oin nia bele halo navegasaun
Bainhira ró patrullamentu ne’e atu halo navegasaun presiza abastesimentu lojístika para apoia. Tanba iha tasi-laran laiha sentru abastesimentu para apoia movimentu navegasaun iha tasi.
Aleinde ne’e, Komandu UPM mós iha planu atu halo manutensaun ba Ró patrullamentu Kayrala hodi fasilita halo serbisu.
Komandu UPM daudaun halo hela proposta atu nune’e bele koloka orsamentu atu halo manutensaun.
UPM daudaun iha ró ba patrollamentu tolu mak hanesan Lusitania, NB1 no NB2, ne’ebé operasionaliza iha Ataúro no balun iha Dili inklui ró kiik sira ne’ebé ho tipu Lansa Rápida ne’e, tolu.
“Ida ita koloka iha UPM Postu Com Lautein no ida koloka iha Postu Beakou, Postu Administrativu Atabae, Munisípiu Bobonaru inklui ida mai koloka iha Dili para apoia atividade salvamentu ninian,” nia katak.
Jornalista : Natalino Costa
Editora : Julia Chatarina
