DILI, 15 Abríl 2026 (TATOLI) – Governu submete ona proposta lei kona-ba Kódigu Propriedade Industriál ba Parlamentu Nasionál (PN) no Meza baixa ona ba Komisaun D, ne’ebé trata Asuntu Ekonomia no Dezenvolvimentu, hodi halo ajendamentu ba diskusaun.
Prezidente Komisaun D, Ricardo Baptista, konsidera inisiativa ne’e importante, tanba ne’e sei tau ajenda hodi hahú halo audiénsia públika molok avansa ba diskusaun.
Iha audiénsia públika sei marka prezensa husi entidade relevante sira husi parte Governu, sosiedade sívil no setór privadu.
Objetivu husi kriasaun Kódigu Propriedade Industriál hanesan rekizitu ida iha ámbitu adezaun Timor-Leste ba Organizasaun Mundiál Komérsiu (OMK) no integrasaun ba Asosiasaun Nasaun Sudeste Aziátiku (ASEAN, sigla inglés).
Prosesu sira-ne’e ezije kumprimentu ba akordu OMK nian kona-ba aspetu Direitu Propriedade Intelektuál relasiona ho Komérsiu (TRIPS) no armonizasaun ho dispozisaun sira husi konvensaun internasionál sira ne’ebé regula husi Organizasaun Mundiál ba Propriedade Intelektuál.
Kódigu Propriedade Industriál iha artigu 282, ne’ebé inspira husi direitu komparadu no kompromisu internasionál sira ne’ebé Timor-Leste asume ona no hanoin kona-ba kestaun hotu ne’ebé relasiona ho propriedade industriál, ne’ebé fasilita kompriensaun no uza husi ema hotu iha sira nia atividade sientífiku, kreativu no ekonómiku, presiza atu uza kódigu ne’e.
Lembra katak proposta lei ida-ne’e hetan ona aprovasaun husi Governu iha loron 20 Marsu 2024 no haruka ona ba PN, maibé, durante prosesu lejizlativu, identifika ona nesesidade atu halo revizaun, nune’e diploma ne’e limitadu ba aspetu mínimu sira ne’ebé ezije husi kompromisu internasionál sira, ne’ebé lori ba elaborasaun proposta foun ida, nune’e parte Ezekutivu retira filafali diploma ne’e iha PN.
Rekorda mós katak, iha loron 12 Fevereiru 2025, Konsellu Ministru aprova ona, diploma ne’e, iha ne’ebé aprezenta husi Ministru Komérsiu no Indústria, Filipus Nino Pereira.
Notísia relevante: Governu aprova Kódigu Propriedade Industriál
Jornalista: Nelson de Sousa
Editora: Isaura Lemos de Deus
