DILI, 15 Abríl 2026 (TATOLI)—Ministériu Ensinu Superiór, Siénsia no Kultura (MESSK) prepara ona millaun $1,5 ba Institutu Ensinu Superiór (IES) atu reforsa atividade no aumenta kualidade.
“Subvensaun públika ne’e atu reforsa ba atividade Institutu Ensinu Superiór sira-nian hodi hasa’e kualidade ensinu superór sira, ne’ebé aloka montante millaun $1.5,” Ministru Ensinu Superiór, Siénsia no Kultura, José Honório da Costa Pereira Jerónimo hato’o ba Jornalista sira iha Palásiu Governu, Kuarta ne’e.
Nia dehan, prosesu atribuisaun ne’e rasik sei fahe ba faze rua hodi ezekuta ba planu ne’ebé propoin husi Institutu Ensinu Superiór sira.
“Maibé kona-ba montante ba kada Institutu Ensinu Superiór, ita haree husi montante ne’ebé iha, maibé kada institutuisaun bele hetan purvolta $40.000 to’o $50.000,” nia akresenta.
Notísia relevante : Governu prosesu hela subvensaun públika ba IES tolu
Governante ne’e esplika, subvensaun ne’e atribui bazeia ba avaliasaun universidade ida-idak nian.
“Ita atribui bazeia ba sira-nia avaliasaun, balun ne’ebé A, balun ne’ebé B no balun ne’ebé foun tuir akreditasaun ne’ebé ANAAA (Ajénsia Nasionál Avaliasaun Akreditasaun Akadémika) atribui,” José Honório, tenik.
IES iha Timor-Leste hamutuk 19 hanesan Universidade da Paz (UNPAZ), Universidade Dili (UNDIL), Universidade Orientál Timor-Lorosa’e (UNITAL), Universidade Católica Timorense (UCT), Dili Institute of Technologi (DIT), Institute of Business (IOB), Institute Filozofia no Teolojia Fatumeta, JSI, no seluk tan ne’ebé mak durante ne’e ativu hela.
Jornalista : Osória Marques
Editora : Julia Chatarina
