DILI, 16 Abríl 2026 (TATOLI) – Deputada husi bankada Kongresu Nasionál Rekonstrusaun Timorense (CNRT, sigla portugés), Virgina Ana Belo, husu ba entidade kompetente atu halo investigasaun kle’an ba kazu osan falsu.
Nia hato’o ezijénsia ne’e relasiona ho Polísia Nasionál Timor-Leste (PNTL), liuhusi Diresaun Nasionál Servisu Investigasaun Kriminál, ne’ebé, iha loron 15 Abríl, deteta armazein ida iha área Bidau, Aldeia Sagrada Família, Suku Bidau Santa-Ana, Postu Administrativu Kristu Rei, rai osan ho montante boot ne’ebé suspeitadu falsu.
Virgina Ana Belo sujere ba Governu atu hato’o deklarasaun ofisiál ruma relasiona ho kestaun ne’e hodi labele hamosu pániku iha sosiedade, tanba hafoin polísia halo apreensaun ba osan ne’ebé suspeitadu falsu, iha mós informasaun ne’ebé espalla katak osan referidu nu’udar “brinkedu no la’ós osan falsifikadu”.
“Agora sira [PNTL] halo hela investigasaun. Tanba hafoin informasaun ne’e sai, iha fali informasaun ida kontrária, haree osan ne’e espalla iha mídia sosiál katak, ne’e kópia ba uzu privadu no hatama mai husi liur ho legalmente iha autorizasaun,”nia hateten. Hodi akresenta, presiza duni investigasaun klean hodi hatene loloos.
Nune’e mós deputada Maria Angelica Rangel husi bankada Frente Revolusionária Timor-Leste Independente (FRETILIN, sigla portugés) solisita ba autoridade seguransa atu halo investigasaun kle’an ba kestaun referida.
Notísia relevante: Xanana husu autoridade seguransa halo investigasaun kle’an ba kazu osan falsu
Jornalista: Nelson de Sousa
Editora: Isaura Lemos de Deus
