DILI, 16 Abríl 2026 (TATOLI)–Polísia Nasionál Timor-Leste (PNTL) liuhusi Diresaun Nasionál Servisu Investigasaun Kriminál (DNSIK) bolu xineza ida ne’ebé ko’alia iha rede sosiál kona-ba osan falsu ne’ebé antes ne’e ekipa halo buska no apreensaun iha armazein ida iha Bidau, Kuarta (15/04) ne’e.
Diretór Nasionál Servisu Investigasaun Kriminál, Superintendente Xefe Polísia João Belo dos Reis, hateten, Polísia lori sidadaun xineza ho insiál A hodi halo identifikasaun.
“Ohin ita bolu sidadaun ne’e mai, ita halo prosesu ketak ida ba nia tanba publikasaun ne’ebé nia halo,” João Belo hateten ba Jornalista sira liuhusi konferénsia imprensa ne’ebé halo iha Komandu Jerál PNTL, Kaikoli, Kinta ne’e.
Notísia relevante : PNTL: Osan millaun $4 aprendidu iha armazein Bidau Masau konfirmadu falsu
Nia dehan, ekipa responsável sei halo investigasaun kona-ba sidadaun ne’e nia envolvimentu ba kazu ne’e.
“Dala ida tan ha’u labele tama to’o klean, tanba ne’e hola parte iha segredu justisa, orsida ladi’ak tanba ne’e mak atu kle’an liu bainhira sira ne’ebé sente buat ne’e laloos ba justifika iha Tribunál,” nia akresenta.
Hodi hatutan: “Ita bolu mai husu kona-ba nia koñesimentu ba área ida-ne’e, nia relasaun oinsá ita husu ona informasaun ba nia.”
Jornalista : Natalino Costa
Editora : Julia Chatarina
