DILI, 17 Abríl 2026 (TATOLI)–Polísia Nasionál Timor-Leste (PNTL) kontinua halo investigasaun kle’an ba sirkulasaun osan falsu ne’ebé daudaun ne’e virál iha públiku no balun sirkula ona iha merkadu tanba autór sira konsege utiliza ba sosa sasán iha loja sira iha Kapitál Dili, ho nune’e autoridade seguransa laiha toleránsia ba autór sira-ne’ebé prodús osan falsu.
Segundu Komandante Jerál Polísia Nasionál Timor-Leste (PNTL), Asistente Komisária Polísia Natercia Martins, hateten iha parte seguransa ne’e la’ós haree ba ema baku malu de’it maibé haree iha aspeitu lubuk ida.
Notísia Relevante: Xanana husu autoridade seguransa halo investigasaun kle’an ba kazu osan falsu
“Primeiru haree katak ita-nia populasaun ho númeru aas ne’ebé la hatene lee no hakerek no laiha kapasidade atu halo diferensa entre osan falsu no osan orijinál. Iha ne’ebá, ha’u bele dehan buat rua ona, sira bele utiliza defisiensia ne’ebé ita iha hodi bosok ita-nia komunidade. Prova ne’ebé ita haree mak fó sai husi ita-nia Komandante Investigasaun Kriminál dehan katak, osan ne’e iha loron hirak antes ne’e autór sira utiliza ba sosa sasán, signifika katak osan ida sira dehan kopia ou halimar ne’e, sosa ona sasán no hetan osan orijinál tama ba sira-nia bolsu, ida-ne’e mak ita la tolera,” Asistente Komisária Polísia Natercia Martins, hateten ba jornalista sira iha Palásiu Prezidensiál Nicolau Lobato, Bairru Pite, ohin.
Nia hatutan, iha de’it kapitál Dili mak autór sira utiliza sosa ona sasán oinsá lori tan ba munisípiu sira hodi bosok komunidade hirak ne’ebé laiha kbiit atu define osan falsu ka osan orijinál.
“Iha Dili de’it sira utiliza ona, oinsá sira bele lori sai ba foho sira iha área rurál no remots, sira utiliza ba sosa rai ezemplu, sira uza ba hafolin feto ezemplu, tanba ita haree maluk barak mak vulneravel la halimar. Buat barak tan ha’u labele ko’alia iha ne’e, husi prosesu ne’e la’o, osan tebes ou la tebes ne’e buat ketak ida, to’o iha Tribunál mak deside ou foti desizaun katak osan ne’e mai atu halimar de’it ka ou halo atividade ruma ka, Tribunál mak iha kompeténsia,” nia esplika.
Iha oportunidade ne’e, Natercia husu ba timoroan hotu atu matan moris neon na’in tanba Timor-Leste ba timoroan hotu no nasaun ne’e presiza seguru husi krime hotu ne’ebé la fó benefisiu.
“Husu ba timoroan hotu, nasaun ne’e ita hotu nian, matan moris neon na’in, nasaun ne’e presiza seguru. Buat sira-ne’ebé lori inseguransa mai ita ne’e lori oinsá halo ita-nia matan ne’e kaan, mais ita la domina ita-nia an, ita la domina ita-nia espíritu atu hadomi rai ida-ne’e ho povu nia seguransa, dalabarak ita monu,” Natercia dehan.
Antes ne’e, Polísia halo ona aprensaun ba osan falsu hamutuk millaun $4-resin iha armazen ida iha Bidau Dili.
Dadaun ne’e, PNTL asegura ona autór hirak ne’ebé prodús osan falsu no agora daudaun submete ona ba prosesu investigasaun.
Notísia Relevante: Parlamentu husu investigasaun kle’an ba kazu osan falsu
Jornalista : Hortencio Sanchez
Editór : Cancio Ximenes
