BOBONARU,18 Abríl 2026 (TATOLI)-Primeiru Ministru (PM), Kayrala Xanana Gusmão, bervalmente orienta Ministru Obras Publika, Samuel Marsal, no instituisaun relevante sira atu aselera prosesu aprovizionamentu no konkursu públiku ba projetu reabilitasaum estrada urbana iha Munisípiu Bobonaru hanesan trosu Maliana-Bobonaru, Maliana-Kailaku, Lourba- Atsabe no Oe-leu ba Loloto’e.
Xefe Governu hato’o orientasaun ne’e durante halo intervensaun ba seremónia inaugurasaun projetu reabilitasaun estrada urbana Maliana vila pakote I no II.
Notísia Relevante:Marsu, MOP implementa projetu reabilitasaun estrada rurál kilómetru 16 iha Bobonaru
“Ohin ne’e iha de’it Maliana laran, ba Bobonaru seidauk ba fatin seluk seidauk mos, ita husu de’it husi Batugade bele lala’is, husi ne’e ba Bobonaru kontinua ba hodi povu bele hetan asesu ba buat hotu-hotu, saúde, Edukasaun, ba merkadu, ba Turizmu” nia dehan iha Jinajíu Maliana, Sábadu ne’e
Ministru Obras Públika, Samuel Marsal, konfirma Ministériu ne’ebé nia lidera tau atensaun másima ba estrada, bee-moos no eletrisidade tanba setór hirak ne’e importante tebes no povu presiza lor-loron.
Samuel akresenta, estrada iha Munisípiu kuaze iha ona prosesu nia laran hanesan trosu Lourba-Atsabe iha ona kompaña manan-na’in no sei halo lansamentu iha tempu-badak, trosu Maliana-Kailaku no Loloto’e iha ona faze aprovizionamentu finál no trosu Lourba ba Zumalai mós sei asina kontratu iha tempu-badak, enkuantu trosu Maliana-Bobonaru mak foin prosesu halo dezeñu no BoQ.
“Ha’u koalia ida-ne’e la’ós dehan ita halo buat barak, ko’alia ida-ne’e atu dehan povu sira ita pasiénsia uituan, governu ida-ne’e tau atensaun másima teb-tebes ba iha estrada, estrada sira ne’e ita tau atensaun tanba liga husi Munisípiu ba Munisípiu, husi Munisípiu ba postu no suku para hodi fasilita movimentu ekonomia populasaun sira iha territóriu tomak,” nia dehan.
Estrada hirak ne’e, Samuel konsidera la’ós dehan governu haka’as-an atu finaliza hotu iha tinan ne’e, maibé molok tinan-2026 nia rohan sei inaugura tan iha trosu balun.
“Imi Maliana, ohin ha’u haree só Maliana mak estrada tama to’o natar laran sira ne’e, la’ós de’it ida ne’e ha’u espera katak antes do fim-do-anu ida ne’e, señor primeiru Ministru sei lori tan prezente foun ida ba imi Maliana Bobonaru, husi Batugade mai to’o iha Balibo nia estrada komesa sa’e dadaun ona mai,” nia dehan.
Sorin Seluk, Prezidente Autoridade Munisípiu Bobonaru, Paulo Moniz Maia, informa mós katak Munisípiu Bobonaru rejista totál estrada Nasionál, estrada Urbana-Munisipál no estrada Rurál ne’ebé presiza hadia iha tinan-lima nia laran mai.
Nia afirma estrada hirak ne’e inklui ona iha nia Planu etratéjiku dezenbolvimentu Munisipál Bobonaru 2026-2030 hanesan estrada Nasionál iha totál distánsia 171 km, Estrada Munisipál iha totál distánsia 48.00 km no Estrada Rurál iha Totál hamutuk 444.00 Km.
“Husi totál hirak iha leten, estrada kategoria nasionál sei diminiu tan tanba ita iha projetu on going ida trosu Batugade – Balibo ho distánsia 12.98 km no husi ida ne’e, ita sei falta 158.02 km husi totál 171 km identifikadu atu halo. Númru ida ne’e sei tun tan wainhira trosu Maliana – Lourba, Trosu Lourba – Atsabe, Trosu Oeleo-Lolotoe no trosu Maliana – Kailaco hahú tan,” nia konfirma.
Autoridade munisipál realsa tan katak diresaun servisu Munisipál Obras Públika foti mós dadus trosu Tunubibi-Korluli no trosu Maliana-Utedai, hein trosu rua ne’e bele implementa tan iha tinan ida ne’e no tinan oin mai.
Alende estrada Nasionál no munisipál, Munisípiu Bobonaro mós iha totál projetu kategória estrada rurál hamutuk 39 pakote, no projetu sira ne’e ho estatus on going ka la’ós hela.
“Husi 39 ne’e, iha totál 110.84 km mak bele konsidera atu ramata no sei falta tan 333.16 kmhodi kompleta. Espera iha tinan ida-ne’e no tinan oin mai, ita bele iha tan númeru projetu balun tan ba estrada rurál ninian hodi kompleta númeru km ne’ebé presiza reabilita,” nia hateten.
“Aliende ha’u hato’o relatóriu kona-ba progresu iha setór estrada, Munisípiu mós halo avanasu signifikativu iha área sira seluk setór infraestrutura ninian.
Avansu hirak ne’e inklui bee-moos, husi totál aldeia 193, falta aldeia 18 mak seidauk iha asesu bee-moos, iha setór eletrisidade ita iha melloria signifikante mós. Kuaze suku hotu hetan ona asesu, falta de’it aldeia balun mak seidauk asesu,maibé espera iha tinan oin sei bele kobre hotu aldeia 193,” nia konklui.
Notísia relevante:Estrada Kailaku-Lolotoe iha faze aprovizionamentu finál, Lourba-Atsabe hein implementasaun
Jornalista: Sergio da Cruz
Editór: Rafael Ximenes de A. Belo
