DILI, 20 Abríl 2026 (TATOLI) – Deputadu husi Partidu Demokrátiku (PD), Armando dos Santos Lopes, solisita ba Alfándega atu halo kontrolu ida maka’as iha pontu entrada sira atu evita osan falsu ho kazu sira seluk tama ilegalmente iha Timor-Leste.
Armando Lopes hato’o kestaun ne’e relasiona ho buska no apreensaun husi parte polísia ba osan falsu [kópia] ho montante millaun $4-resin iha armazen ida iha área Bidau, aldeia Sagrada Família, suku Bidau Santa-Ana, postu administrativu Kristu Rei, husi
Ba kazu ne’e Tribunál aplika ona prizaun preventiva ba arguidu na’in-tolu nu’udar sidadaun xinés no daudaun nia prosesu investigasaun kontinua la’o.
“Tuir afirmasaun husi Primeiru-Ministru, osan ho montante tokon $4 deskonfia ema balun fasilita liuhusi área referida”, nia dehan.
Iha sorin seluk, deputadu Natalino dos Santos husi Partidu Kongresu Nasionál Rekonstrusaun Timorense (CNRT, sigla portugés) apresia ho Ministériu Interiór, liuhusi Polísia Nasionál Timor-Leste (PNTL) ne’ebé halo serbisu di’ak no konsege deteta krime organizadu no osan falsu.
Deputadu António Moniz Kalau husi Partidu Frente Revolusionária Timor-Leste Independente (FRETILIN) preokupa ho osan falsu tama ho kuantidade boot liuhusi pontu entrada tanba labele deteta to’o utiliza ba tranzasaun iha merkadu.
Aleinde ne’e, deputadu FRETILIN, Antoninho Doutel Sarmento, preokupa ho xinés na’in-rua ne’ebé supeitadu lori osan $100 falsu hodi bá troka iha loja Centro iha Praia dos Coqueiros halai sai husi Timor-Leste iha semana kotuk husi territóriu nasaun bá fali sira-nia país orijen.
Notísia relevante: Xinés na’in-rua ne’ebé troka osan falsu iha loja Centro sai ona husi Timor-Leste
Jornalista: Nelson de Sousa
Editora: Maria Auxiliadora
