OEKUSI, 21 Abríl 2026 (TATOLI) – Prezidente Autoridade interinu Rejiaun Administrativa Espesiál Oekusi Ambeno (RAEOA), Celestinho Marques, tersa ne’e cesa ona husi nia kargu nu’udar interinu, hafoin Prezidente Autoridade atuál Régio da Cruz Salu retoma nia funsaun iha loron segunda-feira 20 Abríl semana ne’e.
Tanba ne’e molok husik hela nia kargu ne’e, Celestinho Marques ho ekipa atualiza progresu serbisu ba Prezidente Autoridade atuál, ne’ebé garante funsionamentu administrasaun Oekusi durante loron sanolu.
“Enkontru ohin ne’e, atu informa kona-ba despaisu Ministériu Administrasaun Estatál (MAE), númeru 20/04/2026, esplika katak, ha’u-nia prezensa iha Oekusi tanba Prezidente Autoridade RAEOA atuál sei halo hela tratamentu saúde. Iha despaisu ne’e informa katak, bainhira rekupera saúde retoma serbisu mak ha’u sei cesa automatikamente,” informa Celestinho Marques ba Jornalista sira iha Gabinete Autoridade Oekusi, ohin.
Nia hateten, hafoin cesa, sei fila-fali ba nasonál hodi kontinua hala’o nia kna’ar nu’udar Diretór Nasionál Apoia Administrasaun Suku no Aldeia (DENAAS) iha Ministériu Administrasaun Estatál (MAE).
“Ha’u-nia kna’ar nu’udar Prezidente Autoridade RAEOA interinu durante loron sanolu ,serbisu balun konsege hala’o maibé importante koordenasaun serbisu la’o di’ak, nune’e laiha vakum iha atendimentu públiku, nune’e durante loron sanolu prestasaun serbisu ba públiku la’o ho di’ak to’o horsehik Prezidente Autoridade atuál retoma nia funsaun,” nia afirma.
Notísia relevante:Régio Salu retoma hikas funsaun nu’udar Prezidente Autoridade RAEOA
Prezidente Autoridade RAEOA, Régio da Cruz Salu, konsidera kna’ar ne’ebé hala’o durante auzénsia impedimentu serbisu tanba saúde, nu’udar delegasaun kompeténsia MAE hanesan entidade tutelada superentendente ba RAEOA nian.
“Tanba kestaun ha’u-nia saúde ne’e, maka entidade tuteladu ezerse kna’ar importante tanba RAEOA iha períodu tranzitóriu, entaun nu’udar membru Autoridade ita komprende lala’ok institusionál ne’e, saida mak ezerse ona ne’e la’o di’ak. Ha’u hato’o agradese ua’in ba papél entidade tuteladu ba delegasaun kompeténsia hodi kontinua funsionamentu mákina Governu iha RAEOA,” nia katak.
Notísia relevante:Celestinho Marques PA interinu RAEOA
Rekorde fali katak, Celestinho Marques asumi kargu nu’udar Prezidente Autoridade RAEOA interinu iha loron 07 Abríl 2026 bazeia despaisu husi Ministériu Administrasaun Estatál ho númeru referénsia 21/MAE/IV/2026/07/Abríl.
Notísia relevante:Última hora: Governu nomeia Celestinho Marques substitui PA RAEOA
Jornalista: Abílio Elo Nini
Editór: Rafael Ximenes de A. Belo
