OEKUSI, 20 Abríl 2026 (TATOLI) – Ohin, segunda-feira, Régio da Cruz Salu, retoma hikas nia funsaun nu’udar Prezidente Rejiaun Administrativa Espesiál Oekusi Ambeno (RAEOA), hafoin rekuperadu husi kondisaun saúde durante semana tolu, hahú iha loron 27 Marsu to’o 20 Abríl 2026.
“Ha’u hakarak hato’o agradesimentu ba Ministru Administrasaun Estatál (MAE) ho ekipa no tane aas ha’u-nia maun-alin sira, hamutuk ho membru Autoridade RAEOA tomak, halo serbisu importante durante impedimentu ha’u-nia saúde rasik,” nia ko’alia iha salaun konvensaun Palaban Oekusi, ohin.
Notisia relevante:PM Xanana vizita PA RAEOA baixa iha HNGV
Autoridade másima RAEOA ne’e, konfirma, hela loron rua tan, povu Oekusi durante ne’e nia espetativa katak, RAEOA tenkiser iha estrutura definitiva, ida-ne’e akontese tanba serbisu intensivu tebes husi Governu Sentrál ho povu sira iha Oekusi.
“Uluk, ha’u hateten kedas, katak impedimentu saúde ha’u-nian, labele hapara funsionamentu no dever ita hotu, nune’e funsionamentu administrativa Governu nian la’o nafatin, tanba moris hanesan ne’e, dalaruma ita sente kolen no moras, maibé ita tenke kontinua kuida ita-nia an no fó konfiansa ba malu,” nia afirma.
Nia hateten, tuir komunikadu antes ne’e, Ministru Administrasaun Estatál (MAE) no mós Prezidente Autoridade RAEOA interinu, hothotu fó konfiansa katak, “ha’u nia fizikalmente bele hala’o ona serbisu no ohin ha’u retoma fila-fali ha’u-nia kna’ar, hanesan Prezidente Autoridade,”
Notísia relevante:PA RAEOA fó konfiansa ba Celestinho Marques lidera Oekusi to’o estrutura definitiva
Maibé nia dehan, aban, loron tersa-feira 21 Abríl, membru Autoridade RAEOA no Prezidente Autoridade RAEOA interinu, sei hala’o enkontru ofisiál ida, atu kontinua haree serbisu saida de’it mak tenki halo.
Tanba bainhira kuandu estrutura definitiva akontese no prosesu harii podér lokál ne’e la’o, ita sei presiza nafatin akompañamentu, nune’e funsionamentu administrativu poder lokál ne’e tenke la’o ho di’ak, hothotu ita tane modelu Timor-Leste ida de’it.
“Dala ida tan, ha’u haraik-an ba kolega sira-ne’ebé serbisu maka’as serbisu ho fuan, hala’o nafatin funsionamentu administrasaun ba Governu la’o nafatin ho di’ak, durante ha’u-nia auzente,” nia katak.
Notísia relevante:Celestinho Marques PA interinu RAEOA
Jornalista: Abílio Elo Nini
Editór: Rafael Ximenes de A. Belo
