BOBONARU, 21 Abríl 2026 (TATOLI) – Udan-boot ne’ebé tau husi tuku 14h00 to’o tuku 16h20 rezulta ponte Bolubou, iha suku Manapa, postu administrativu Kailaku, munisípiu Bobonaru, kotu filafali tanba kontentór ne’ebé Governu monta foin lalais ne’e la augenta ho presaun bee-mota.
Ho ponte ne’ebé kotu ne’e kauza movimentasaun públiku husi kapitál Maliana bá Kailaku provizóriu paradu.
“Ponte ne’e kotu filafali tanba bee maka’as”, Koordenadór Infraestrutura Ministériu Obra Públika Munisípiu Bobonaru, Fernando de Fátima, dehan ba Tatoli via WhatsApp, ohin.
Xefe suku Manapa, Zeferino Loco Bere, preukupa no konsidera normalizasaun temporaria de’it labele rezolve problema, tanba agora udan seidauk para.
Notísia relevante: IGEADE normaliza ona ponte Bulobu iha Kailaku
“Hori bainhira normaliza ne’e provizóriu de’it atu fasilita movimentu komunidade nian, maibé ita haree ba ninia kualidade labele tahan udan-boot, entaun bee mai maka’as, nia kotu filafali, tanba normaliza de’it ho rai-henek, kuandu bee tebe maka’as monu filafali”, Zeferino dehan.
Xefe suku ne’e husu governu atu aselera prosesu reabilitasaun estrada trosu Mau-Mali liga bá postu administrativu Kailaku, nune’e bele rezolve problema ne’e. “Tinan-Tinan ponte ne’e kotu, IGEADI mai normaliza beibeik, di’ak liu halo foun para bele dura”, nia sujere.
Antes ne’e, iha serimonia inaugurasaun estrada Urbana Maliana, Ministru Obra Públika, Samuel Marçal, deklara katak ponte ne’e tama ona iha kontratu.
“Espera katak iha fulan ida, rua, ne’e mós ita sei asina kontratu husi Letefoho Ermera mai Atsabe, Lourba mai to’o Kailaku-Bobonaru. Ne’ebé husu ba komunidade pasiénsia uitoan”, dehan.
Lembra katak iha fulan-Marsu ne’e ponte referidu kotu besik semana ida-resin no foin lalais ne’e mak Governu halo normalizasaun, maibé la to’o fulan ida kotu filafali.
Notísia relevante: Ponte Bulobu kotu difikulta estudante 50 labele asesu bá edukasaun
Jornalista: Sergio da Cruz
Editora: Maria Auxiliadora
