BAUKAU, 21 Abríl 2026 (TATOLI)—Sekretáriu Tékniku Administrasaun Eleitorál (STAE) Munisípiu Baukau klarifika prosesu teste eskrita ligadu ho rekrutamentu funsionáriu kontratadu tékniku ofisiál ne’ebé sai polémika iha rede sosiál.
Diretór STAE Baukau, Natividade Freitas Guterres konsidera pesoál ne’ebé publika informasaun iha rede sosiál dúvida ho diferente valór iha vaga tolu ne’ebé kandidatu sira kompete ba nune’e kategoria falta koñesimentu no kompriensaun kona-ba prosesu rekrutamentu ba iha STAE Baukau.
“Ami publika sai hotu ba públiku. Laiha familiarizmu maibé iha rede sosiál ne’e ita konsidera falta kompriensaun tanba vaga iha tolu ne’ebé diferente,” Diretór STAE Baukau informa ba TATOLI iha ninia kna’ar fatin, Vila Nova, Tersa ne’e.
Natividade Guterres relata husi totál kandidatu ne’ebé partisipa teste maioria kompete vaga tolu nune’e tuir rekizitu husi ekipa juri deside kandidatura na’in-lima ne’ebé hetan valór aas liu mak konsideradu pasa ba faze entrevista.
Natividade haktuir informasaun iha rede sosiál hanesan kandidatu ne’ebé mensionadu la pasa mezmu hetan valór 48, tanba iha kandidatura na’in-lima seluk ne’ebé valor aas liuhusi vaga asistente operadór, enkuantu kandidatu seluk hetan valór 32 pasa kategoria iha valór aas ne’ebé diferente vaga ba operadór sistema.
Antes ne’e, kandidatu na’in-337 kompete iha vaga tolu hanesan pontu vokál, operadór sistema no asistente operadór tuir teste eskrita iha-ne’ebé rezultadu fó-sai na’in-120 mak pasa ba faze entrevista.
Entretantu, tuir planu, na’in-24 mak sei hetan kontratu kompostu pontu vokál na’in-ualu, operadór sistema na’in-ualu no asistente operadór na’in-ualu ne’ebé sei destaka ba postu administrativu ualu iha Munisípiu Baukau.
Jornalista: Natalino Belo
Editór: Xisto Freitas da Piedade
