DILI, 09 Abríl 2026 (TATOLI) – Amu-Papa Leão XIV fó ben-vindu ba akordu sesarfogu iha Médiu Oriente no konvida sarani sira iha mundu tomak atu partisipa iha Vijília Orasaun ba Dame ne’ebé sei hala’o iha loron 11 fulan-abríl.
Tuir Vatican News ne’ebé Tatoli asesu, kona-ba funu iha Média Oriente ne’ebé iha ona desizaun provizóriu hapara atake ba Iraun Amu-Papa konsidera katak novidade ka informasaun ida-ne’e di’ak no simu ho satisfasaun tanba ida-ne’e hanesan sinál ida esperansa nian ne’ebé kle’an.
Amu Papa hato’o liafuan hirak ne’e iha sarani lubuk uain ne’ebé halibur an iha resintu ka Prasa Bazílika S.Pedro. Amu-Papa subliña katak atu hetan pás, pás bele hetan de’it liuhusi diálogu.
Nune’e, Amu-Papa konvida sarani sira iha mundu atu akompaña prosesu diplomátiku ne’ebé la’o daudaun ho orasaun, hein katak abertura ba diálogu bele sai meiu ida atu rezolve konflitu sira, la’ós de’it iha Médiu Oriente maibé mós iha parte sira seluk mundu nian.
Tuir Amu-Papa, Vijília Orasaun ba Dame sei hala’o iha loron 11 fulan-Abril iha Bazílika São Pedro nian iha tuku 6:00 p.m oras Roma nian, ne’ebé sei lidera hosi Amu-Papa nakloke ba ema hotu bele partisipa diretamente, no bele mós akompaña husi uma de’it.
Entretantu, Iraun, Estadu Unidu no Israel hetan ona akordu sesarfogu nian durante semana rua. Tuir informasaun, Prezidente Estadu Unidu Amérika, Donald Trump, retira ona nia ameasa sira hasoru Iraun.
Iha deklarasaun ketak ida, primeiru-ministru israelita, Benjamin Netanyahu, hatudu apoiu ba suspensaun semana rua hosi atentadu sira. Maibé, nia subliña katak akordu sesarfogu nian la kobre Líbanu, ne’ebé tuir informasaun ema na’in 1.500 resin mate ona iha konflitu.
TATOLI
