DILI, 23 Abril 2026 (TATOLI)—Diretór Servisu Saúde Munisípiu Dili, Mateus Pinto, hateten durante Semana tolu Servisu Saúde Munisípiu Dili nafatin rejista kazu dengue husi loron 01 to’o 22 fulan-Abríl hamutuk 90.
“Signifika katak esforsu ne’ebé mak ita halo hahú Fevereiru mai ne’e la saugate. Ita bele dehan esforsu ida-ne’e iha rezultadu, katak dengue iha Abríl ne’e ita bele hatun ka minimiza,” Mateus Pinto hatten ba Jornalista sira hafoin akompaña delegasaun Membru Parlamentu Nasionál husi Austrália halo vizita ba Sentru Saúde Internamentu Vera-Kruz, ohin.
Nia esplika, kazu 90 ne’e bele halo komparasaun ho fulan-Marsu kazu dengue hamutuk 400, maibe ba fulan ne’e komesa redús ona.
“Ha’u hanoin karik fulan ne’e ramata ita bele dehan to’o 100 mais ita sei la to’o 200 dala ruma to’o 100 ida de’it karik. Tanba ne’e, ita bele garante katak iha fulan-Maiu ita bele redús liu tan ida ne’e, tanba ha’u hanoin ida ne’e mak oinsá kontribuisaun husi komunidade no autoridade komunitáriu sira oinsá ita bele redúz,” nia subliña.
Nia dehan, kazu 90 ne’e rejistu husi Sentru Saúde haat ne’ebé mak iha Dili laran no maioria husi Sentru Saúde Komoro mak barak liu.
“Kada sentru saúde hamutuk hira ha’u ladún lembra, maibé Komoro maka barak liu. Depois tuir Bekora, tuir mai Vera-Kruz, depois tuir Formoza no mós klínika privadu sira-ne’ebé mak iha Dili relatá mai iha Servisu Saúde Munisípiu Dili nian,” nia esplika.
Kona ba sctok ai-moruk abate no malation, nia dehan, daudaun ne’e sufisiente hela tanba ohin mak tama tan.
“Ita-nia abate no malation sufisiente hodi responde iha sitausaun balun kontínua mosu,maibé ha’u hanoin to’o Maiu ita bele menus tan. Tanba ne’e, ita husu nafatin ba komunidade kontinua halo prevensaun, liuliu ita-nia ki’ikoan sira-ne’ebé iha sintoma isin-manas karik, favór ida lori lalais ba sentru saúde sira para bele hetan tratamentu no halo teste ba raan,” nia dehan.
Jornalista : Felicidade Ximenes
Editór : Cancio Ximenes
