DILI, 27 Abríl 2026 (TATOLI)—Ministériu Finansa (MF) inisia ona medida hitu ba Ajustamentu Orsamentu Retifikativu tinan 2026 ho totál konsolidadu ajustadu $2.400.100.000, husi montante inisiál $2.214.689.195 Orsamentu Jerál Estadu (OJE) 2026.
Nune’e, Ministra Finansa, Santina José Rodrigues Ferreira Viegas Cardoso, akompaña husi Vise-Ministra Finansas Regina de Jesus de Sousa, inklui jestór sira iha MF, aprezenta medida Orsamentu Retifikativu ba Primeiru-Ministru, Kay Rala Xanana Gusmão, ne’ebé iha tempu badak sei submete proposta ba Parlamentu Nasionál hodi halo debate no hetan aprovasaun.
Notísia relevante : PN aprova proposta OJE 2026 iha finál globál
Medida hitu ba Orsamentu Retifikativu mak hanesan seguransa alimetár, subsídiu kombustível ba públiku, seguransa nasionál-rekrutamentu kadetes Polísia Nasionál Timor-Leste (PNTL), medida husi Ministériu Administrasaun Estatál (MAE)-munisípiu, reforsa provizaun despeza kontijénsia iha Dotasaun Jerál Estadu (DJE), repoin orsamentu DJE no Ministériu Petróleu no Rekursu Minerál (MPRM), ne’ebé utiliza ona hodi kompra kombustível ba rezerva nasionál.
“Fontes finansiamentu identifikadu atu finansia Orsamentu Retifikativu maka realokasaun orsamentu Fundu Infraestrutura no Liña Ministériu sira, utilizasaun saldu iha konta bankária la efetiva, inklui utilizasaun saldu jerénsia Institutu Nasionál Seguransa Sosiál,” referidu nota husi Governu ne’ebé Jénsia TATOLI asesu iha Segunda ne’e.
Biban ne’e aprezenta mós ba Primeiru-Ministru kona-ba proposta lei sira ligadu ba Lei OJE ne’ebé halo alterasaun ba pontu prinsipál tolu de’it.
Antes ne’e, iha loron 21 Novembru 2025 Parlamentu Nasionál liuhusi reuniaun plenaria estraordinária, aprova ona proposta OJE ba tinan fiskál 2026 ho montante $2.214.689,195 iha finál globál ho votu afavór 42 , kontra 0 no abstensaun 23.
Proposta ne’e aloka ba saláriu no vensimentu $476.870.249, bens no servisu korrente $447.904.446, transferénsia públika $820.710.160, kapitál menór $32.556,96, kapitál dezenvolvimentu $436.647.379.
Proposta orsamentu iha sub-setór tolu hanesan koloka ba administrasaun sentrál, seguransa sosiál, no sub-setór Rejiaun Administrativa Espesiál Oekusi-Ambenu (RAEOA), ho totál biliaun $2,291.
Orsamentu ne’e prevee biliaun $2,215 ba Administrasaun Sentrál, millaun $60 ba RAEOA, millaun $30 mai husi reseita rasik, Seguransa Sosiál millaun $170, no millaun $46 mai husi reseita rasik.
TATOLI
