Komunidade husu konstrui ponte temporária iha Asudai
BOBONARU, 29 Abríl 2026 (TATOLI) – Komunidade no motorista transporte públiku sira husu ba Governu atu konstrui ponte temporária ida tanba kondisaun estrada iha área minimerkadu Asudai, suku Malilait, postu administrativu Bobobaru, daudaun la seguru ba utilizadór sira, liuliu iha tempu udan.
Estrada ne’e importante tebes tanba liga Munisípiu Bobonaru ho Ermera no Kovalima, maibé agora la permite veíkulu sira atu liu ho seguru. Danus grave akontese tanba rai no fatuk kontinua monu, halo dalan sai aat no perigu. Situasaun ne’e mós impede asesu ba nesesidade bázika no serbisu importante sira.
Motorista Antero Lopes hateten katak kondisaun estrada difikulta tebes movimentasaun transporte, liuliu ba veíkulu roda haat.
Notísia relevante: IGEADI normaliza estrada iha Asudai-Malilait
“Motor sei bele liu uitoan, maibé karreta tenke dada-malu. Bainhira karreta boot atu liu, komunidade tenke dudu hodi ajuda tanba dalan la di’ak ona. Besi-riin sira ne’ebé tau mós mamar no kois, ita hakat de’it mós ta’uk. Satán ho karreta, liuliu tula sasán todan, besi halai atu baku fila de’it ona”, nia dehan ba Tatoli, iha Bobonaru.
Tuir nia, Institutu Jestaun Ekipamentu no Apoiu Dezenvolvimentu Infraestrutura (IGEADI) halo ona intervensaun dala-rua, maibé seidauk fó rezultadu ne’ebé duradouru. Komunidade mós tenta halo manutensaun simples, maibé situasaun sai aat liután iha tempu udan.
Komunidade seluk Afonso dos Santos husu ba Governu atu toma asaun lalais hodi responde ba problema ne’e. Nia sujere atu konstrui ponte temporária tanba rai-halai ona besik metru sanulu-resin.
“Di’ak liu halo ponte temporária ida para ami bele liu bá-mai ho seguru. Se la halo, bainhira udan maka’as, ami labele liu. Ema moras ruma mós sei susar atu lori bá ospitál”, nia dehan.
Komunidade espera katak Governu bele implementa projetu hadi’ak estrada ne’e iha tempu badak atu garante mobilidade no seguransa ba populasaun sira iha área ne’e.
Diretór Servisu Munisipál Obra Públika, Munisípiu Bobonaru, Marcelino Godinho, konfirma katak parte IGEADI halo ona levantamentu dadus iha terrenu no sei rezolve iha tempu badak. “Ekipa IGEADI mós halo ona survey iha terrenu, maibe sira dehan mákina mak sei avaria”, nia haktuir.
Tuir observasaun jornalista Tatoli iha terrenu, transporte roda rua sei bele liu ho seguru, tanba siha espasu natoon, maibé ba transporte roda haat susar tanba estrutura rai mamar no instalasaun besi-riin eletrisidade ne’ebé komunidade monta ne’e mós kle’uk no mamar hotu ona.
Ministru Planeamentu no Investimentu Estratéjiku, Gastão de Sousa, antes ne’e relata katak estrada trosu husi suku Lourba, postu Bobonaru, liga ba postu Atsabe, nisípiu Ermera tempu, sei selebra kontratu, iha tempu badak, ho empreza Shanghai Construction Group Co.Ltd., ho valór orsamentu $43.199.259,51 ho distánsia kilómetru 48,93.
Notísia relevante: Estrada ligasaun Bobonaru-Zumalai no Atsabe ameasada kotu
Jornalista: Sergio da Cruz
Editora: Maria Auxiliadora
