DILI, 30 Abríl 2026 (TATOLI) – Ministériu Agrikultura, Pekuária, Peska no Floresta (MAPPF), entre Janeiru no Marsu 2026, ezekuta ona 10% husi Orsamentu Jerál Estadu (OJE) 2026, ho totál $22.450.883.
Diretór Nasionál Administrasaun no Finansa MAPPF, António Araújo da Costa, dehan ministériu hetan alokasaun orsamentu ba kategoria lima mak saláriu no vensimentu $7.161.859, bens no servisu $10.566.758, transferénsia públika $35.743,29, kapitál menór $3.921.533, no kapitál dezenvolvimentu $764.989. Totál alokasaun hamutuk $22.450.883.
Nia dehan husi orsamentu ne’ebé ezekuta iha obligasaun $169.658 (1%) no kompromisu $8.679.716,59 (39%).
“Ita-nia ezekuasaun foin 10% no kompromisu boot tanba iha mundansa ba Lei Aprovizionamentu, ne’ebé prosesu hotu tenke hatama eletróniku. Ida-ne’e ita foin implementa entaun afeta ba ezekusaun sei ki’ik tanba dadus hotu tenke hatama ba sistema foin prosesu la’o”, António Araújo da Costa esplika ba Tatoli, ohin.
Nia relata katak orsamentu ba projetu sira iha prosesu aprovizionamentu tantu foun no kontinua daudaun balun iha hela faze konkursu públiku no seluk atu halo pagamentu purvolta millaun $10, maibé ba pagamentu nian ne’e ki’ik loos tanba obrigasaun foin 1%
“Projetu sira aprovizionamentu ne’e barak liu mak irrigasaun nian. Projetu foun mós iha, maibé iha mós projetu kontinuasaun sira-ne’ebé ita atu selu tenke liuhusi prosesu aprovizinamentu”, nia salienta.
Jornalista: Arminda Fonseca
Editora: Maria Auxiliadora
