DILI, 30 Abríl 2026 (TATOLI)––Polísia Nasionál Timor-Leste (PNTL) liuhusi Diresaun Servisu Investigasaun Kriminál (DSIK) hamutuk Forense Komandu Jerál, Kinta ne’e, ezekuta mandadu Tribunál Judisiál Primeira Instánsia Dili (TJPID) ho númeru prosesu NUK 0069/26.PNSIK hodi halo buska no apreensaun domisiliáriu ba sidadaun na’in-rua ho inisiál FFS no JX GdS, iha sira-nia rezidénsia iha Suku Fatuhada no Bekora.
Durante operasaun, ekipa DSIK konsege asegura evidénsia hanesan leptop rua, telemóvel rua, konta bankária no pasaporte husi sidadaun na’in-rua ne’e.
Hafoin atividade ne’e, ekipa investigadór lori kedan sidadaun na’in-rua bá DSIK nia fatin hodi halo identifikasaun.
Notísia relevante : Xinés na’in-rua ne’ebé troka osan falsu iha loja Centro sai ona husi Timor-Leste
Antes ne’e, iha loron 16 Abríl 2026, ekipa investigadór detein ona suspeitu na’in-tolu ho inisiál WYF, JT no WY ne’ebé suspeitadu envolve iha produsaun osan falsu, iha armazein ho na’in xineza iha área Bidau Masau, Aldeia Sagrada Família, Suku Bidau Santa-Ana, Postu Kristu Rei, Munisípiu Dili.
Liu tiha loron hira, Tribunál Judisiál Primeira Instánsia Dili aplika medida Prizaun Preventiva ba arguidu na’in-tolu ne’ebé suspeitadu ba kazu osan falsu.
Nune’e mós, xineza na’in-rua ne’ebé suspeitadu lori osan $100 falsu halo transasaun iha loja Centro iha Praia dos Coqueiros, iha Domingu (19/04) sai husi territóriu Timor-Leste bá nasaun orijen Xina.
Sidadaun na’in-rua ne’e lori osan falsu $100 ba hola sasán dala-rua iha Loja Centro, hafoin sira hola tiha sasán atu ba troka iha fatin selu nian, traballadór iha loja ne’e lori osan ne’e koko iha mákina osan nian.
Jornalista : Natalino Costa
Editora : Julia Chatarina
