OEKUSI, 05 Maiu 2026 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, informa, Autoridade sei re-ativa fila-fali Eis Koordenadór Zona Ekonómia Espesiál Dezenvolvimentu Oekusi Ambeno (ZEEDOA), Herculano de Sousa, atu apoia serbisu tékniku ba elaborasaun Planu Estratéjiku Dezenvolvimentu Rejiaun (PEDR) faze daruak iha Oekusi ba tinan-lima nian 2027 to’o 2031.
Notísia relevante:RAEOA define pilár haat iha elaborasaun Planu Dezenvolvimentu Estratéjiku Rejionál
Régio da Cruz, hateten, inísia prosesu ne’e, antes ne’e Eis-Koordenadór ZEEDOA maka asumi responsavel másimu, tanba orientasaun husi entidade tutelada superentende RAEOA, Primeiru-Ministru (PM), Kay Rala Xanana Gusmão, katak iha fulan-Jullu 2026 ne’e, PEDR ne’e aprezenta ona iha Konsellu-Ministru hodi hetan ona paresér ba períodu tinan-lima, 2027 to’o 2031.
“Ne’e alta prioridade. Antes ne’e, ha’u mak prezide prosesu ne’e, responsavel másimu husi ekipa ne’e maka Eis-Koordenadór ZEEDOA, ami na’in-rua hasoru malu ona, bainhira entrega nia relatóriu serbisu, ha’u informa ona ba nia katak, ita-boot nafatin apoia ha’u ba serbisu tékniku tenke ativa nafatin atu hahú fali prosesu ne’e,” nia hateten ba jornalista sira iha Oekusi.
Notísia relevante:ZEEDOA konklui Relatóriu Estadu Rejiaun no kontinua prepara PED
Autoridade másima RAEOA ne’e otimista, katak Planu Estratéjiku Dezenvolvimentu Rejiaun nian, tenke la’o nafatin, tanba ajustamentu estrutura definitiva RAEOA ne’e, iha grupu traballu tékniku ba preparasaun PEDR faze daruak ne’e, Eis-Diretór rejionál planeiamentu no aprovizionamentu hanesan vise daruak, maibé agora muda fali ona ba diresaun seluk.
“Ha’u tenkisér re-nomea fila-fali diretór na’in-rua, ida mak Diretór Ajénsia Dezenvolvimentu, ida seluk mak Diretór Rejionál Planeiamentu Dezenvolvimentu Integradu. Ha’u sei bolu fali sira atu rekomposta iha ekipa elaborasaun Planu Estratéjiku Dezenvolvimentu Rejionál daruak nian, ne’ebé ita iha tempu kurtu,” nia promete.
Tuir nia, saida mak sei akontese, RAEOA sei fokuliu halo avaliasaun ba PEDR primeiru husi 2019 to’o 2023, tanba ramata iha 2023 maibé iha momentu ne’e laiha avaliasaun, entaun elaborasaun PEDR segundu sei informa barak husi ne’e.
Maibé, Autoridade sei haree no hadi’a hodi halo revizaun fila-fali tema prinsipál sira, foku ba dezenvolvimentu ekonomia, haforsa institusionál to’o baze, inklui podér lokál no haree buat ne’ebé estratéjiku atu haforsa buat rua.
“Ita tenke serbisu ho tempu kurtu. Ami sei serbisu mate-an tenkisér, ne’e dever atu kumpre ezijiénsia no obrigasaun husi Governu ne’ebé fó ami, agora lejitima ona estrutura RAEOA, signifika laiha ona razaun pendénsia no estagnasaun,” nia hateten.
Notísia relevante:Ministru Tomas Cabral esklarese: Estatutu ZEEDOA la eziste ona
Antes ne’e, Eis-Koordenadór ZEEDOA, Herculano de Sousa, fó-sai katak, Planu Estratéjiku Dezenvolvimentu Rejiaun Administrativa Espesiál Oekusi Ambeno (RAEOA), ba tinan lima 2027 to’o 2031 define pilár prinsipál haat ba asuntu ekonómia, sosiál, infraestrutura no governasaun.
“Konteúdu husi planu dezenvolvimentu ne’e, la sees husi Planu Estratéjiku Dezenvolvimentu Nasionál (PEDN), husi RAEOA nian, ita haree liu ba pilár prinsipál haat, pilár ekonomia, pilár sosiál, infraestrutura no pilar ikus mak governasaun. Pilár haat ne’e ita sei tau hamutuk sai hanesan matadalan prinsipál Oekusi nian ba tinan-lima oin mai,” nia hateten iha reuniaun dahuluk ho ekipa Grupu Serbisu Tékniku (GST), kona-ba prosesu elaborasaun Planu Dezenvolvimentu Estratéjiku Rejionál 2027-2031 iha salaun administrasaun Numbei, foin lalais ne’e.
Jornalista: Abílio Elo Nini
Editór: Rafael Ximenes de A. Belo
